Jambyl oblysynda jedel járdemdi shaqyrý eki esege jýyq azaıǵan
TARAZ. QazAqparat – Jambyl oblysynda jedel járdemdi shaqyrtýlar sany eki esege deıin azaıǵan, dep habarlaıdy QazAqparat tilshisi.
Jambyl oblystyq jedel medıtsınalyq járdem stansasynda táýligine oblys boıynsha 93 jedel járdem brıgadasy qyzmet kórsetýde. Onyń ishinde Taraz qalasy boıynsha 43 brıgada shaqyrtýlarǵa shyǵady. Jedel járdem brıgadalary medıtsınalyq qyzmetkerlermen tolyq qamtamasyz etilgen.
«Jambyl oblystyq jedel medıtsınalyq járdem stansasynyń ortalyq bazasynda 103 Call-ortalyǵy ornalasqan, oblys boıynsha táýlik boıy túsken shaqyrýlardy 12 dıspetcher qabyldaıdy. Qabyldanǵan qońyraýlardy 4 evakýator-dıspetcher shyǵý brıgadalaryna bólip, úılestirip otyrady. Sondaı-aq, qosymsha 2 senim telefony qosylǵan, táýlik boıy oǵan eki aǵa dárigeri jaýap beredi. Pandemııanyń birinshi tolqyny kezinde shaqyrtýlar sany táýligine 2000-nan asqan. Osy oraıda shaqyrtýlar boıynsha keshigýlerdi azaıtý maqsatynda qosymsha arnaıy 5 mobıldi brıgada medıtsınalyq qyzmet kórsetti», - delingen oblystyq Densaýlyq saqtaý basqarmasynyń habarlamasynda.
Qazirgi tańda oblysta jedel járdem shaqyrtýlarynyń táýliktik sany 1200-1300-ge deıin azaıǵan. Ekinshi tolqynǵa daıyndyq jumystaryn júrgizý maqsatynda búginde barlyq jedel járdem brıgadalary dári-dármektermen, qajetti qural-jabdyqtarmen jáne jeke qorǵanysh quraldarymen tolyǵymen qamtamasyz etilgen. Sondaı-aq, oblystyq Densaýlyq saqtaý basqarmasynan qosymsha taǵy eki aılyq qorǵa birrettik qoldanýǵa arnalǵan obaǵa qarsy 60 myń dana kostıýmge, 1000 dana qorǵanysh kózildirikterine, 100 myń dana medıtsınalyq qolǵapqa, 100 myń dana betperdege tapsyrys berilgen.
«Oblystyq jedel járdem stansasynda 135 sanıtarlyq avtokólik tirkelgen, onyń 48 paıyzynyń (65 kólik) esepten shyǵarýǵa qujattary berilgen. 2020 jyldyń sońyna deıin lızıngpen 52 sanıtarlyq avtokólik alynady dep kútilýde»,- delingen vedomstvo málimetinde.
