Jambyl oblysynda jazyqtaǵy sý qoımalaryna aǵyp ketken balyqtar qutqarylýda
TARAZ. QazAqparat - Jambyl oblysyndaǵy tasqyn saldarynan sý qoımalarynyń jaǵdaıy qıyndap tur, dep habarlaıdy «QazAqparat» HAA tilshisi.
Aýa raıynyń kúrt ysýy taýlardaǵy muzdyqtardyń qarqyndy erýin arttyryp, bul óz kezeginde sý qoımalaryndaǵy sýdyń artýyna ákep soqty. Buǵan qosa, arnasyna sý tolǵan ózender arqyly usaq sý qoımalar, kanaldar men sýarmaly aryqtar arqyly jazyq dalaǵa balyqtar aǵyp ketip jatyr. Jambyldaǵy sý qoımalary jybyrlaǵan balyqqa toldy, ózen jaǵalarynan móńke balyq, sazan taǵy basqa balyq túrlerin shelektep aýlap alýǵa bolady.
«Bul balyqtar popýlıatsııasy úshin dabyl qaqtyrarlyq jaǵdaı, - dedi oblystyq orman sharýashylyǵy jáne janýarlar álemi ınspektsııasy bóliminiń bas mamany Marat Dúrimbetov. - Tasqyn Talas, Shý jáne Asa ózenderimen baǵyt alǵan, sol sebepti balyqtar jazyq dala men taıaz sýly jerlerge tap bolady, onyń saldarynan shabaqtar qyrylyp qalady. Aýyl turǵyndary men balyqshylar iri jáne usaq balyqtardy aýlap, qaıtadan ózenge jiberip jatyr, olaı istemese bul jaǵdaı balyqtardyń popýlıatsııasy úshin óte qaýipti. Biz kún saıyn ózenderdi aralap, turǵyndarǵa túsindirý jumystaryn júrgizýge májbúrmiz».
Oblystyq ınspektsııa ókiliniń málimdeýinshe, Talas aýdanyndaǵy Úsharal aýyly jáne Sarysý aýdanyndaǵy Toǵyzkent pen Shaǵalaly aýyldaryndaǵy jaǵdaı óte kúrdeli.
Oblystyq ınspektsııa ókilderiniń Jambyl oblysyndaǵy barlyq iri-usaq ózenderdi aralap shyǵýǵa múmkindigi joq, sondyqtan balyqtyń qyrylýyna qarsy turýǵa qaýqarsyz bolyp otyrǵany jaǵdaıdy ýshyqtyra túsýde. Óıtkeni oblystaǵy ózenderdiń uzyndyǵy aıtarlyqtaı uzaq. Bir Shý ózeniniń ózi myń kılometrge sozylady, Talastyń uzyndyǵy 400 kılometrden artyq, Asa - shamamen 250 shaqyrym. Sol sebepti oblys turǵyndaryna balyqtar qıyn jaǵdaıǵa tap bolǵan sý qoımalary týraly 51-96-91 nómiri boıynsha ınspektsııaǵa habarlaýyn suraıdy.
