Jambyl oblysynda jazǵy ýaqyttaǵy tótenshe jaǵdaılarǵa ázirlik talqylandy
TARAZ. QazAqparat - Jambyl oblysynyń ákimi Kárim Kókirekbaevtyń tóraǵalyǵymen ótken oblys ákimdigindegi apparattyq keńeste jaz kezindegi turǵyndardyń sýǵa shomylý erejelerin saqtaýy, órt qaýipsizdigi tehnıkasy, jaz kezindegi tótenshe jaǵdaılarǵa ázirlik máseleleri talqylandy. Bul týraly óńir basshysynyń baspasóz qyzmeti habarlady .
Jaýyn-shashyndy aýa raıynan keıin oblys aýmaǵynda kúnniń qatty ysyp ketýi tabıǵı órtterdiń tutanýy qaýpin tóndirýde. Jyl basynan beri oblys aýmaǵynda 15 gektar alqap órtenýiniń úsh oqıǵasy tirkeldi, onyń ekeýi erikti órt sóndirý qurylymdarynyń kúshimen sóndirildi. Sonymen birge, Qosqudyq orman sharýashylyǵynda 13,5 gektar orman alqaby órtendi, ony kásibı jáne erikti órt sóndirý jasaqtary birlesken kúsh-jigermen óshirdi.
Oblys TJD málimetteri boıynsha, búgingi tańda aýyl okrýgterinde 171 erikti órt sóndirý qurylymdary quryldy, olardyń jeke quramynda 2 368 adam qamtylǵan, tabıǵı órtterdi sóndiretin qajetti tehnıkalary bar. Orman sharýashylyqtarynda 38 tonna, al aýdandarda - 194 tonna avtomobıl otynynyń jáne janar-jaǵarmaılarynyń rezervi jasalǵan.
Jambyl oblysy TJ boıynsha departamenti basshysynyń orynbasary Talǵat Sabyrovtyń málimetteri boıynsha, bıylǵy jyly memlekettik orman qoryn qorǵaý jónindegi jumystardy júrgizý úshin 33,6 mln. teńge bólingen. Orman jáne dala órtteri paıda bolǵan jaǵdaıda kúshter men quraldardy tartý josparyna túzetýler engizildi, sondaı-aq baılanys, halyqty habardar etý shemalary jasaldy. Barlyq qutqarý bólimsheleri qysqa tolqyndy úzdiksiz radıobaılanyspen qamtamasyz etilgen, taýly jerlerde retranslıator ornatylǵan.
Oblysta ǵaryshtyq monıtorıng júıesi engizildi, aýdany 3,2 mln. gektar memlekettik orman qory aýmaǵyna kúnine eki ret ushaqtarmen baqylaý uıymdastyrylǵan.
Orman órtterin der kezinde anyqtaý úshin 33 órt-baqylaý munaralary ornatylǵan, memlekettik mekemeler aýmaǵyna kiretin jerlerde 16 baqylaý pýnktteri qosymsha uıymdastyrylǵan.
T.Sabyrov aýyl sharýashylyǵy nysandarynyń aınalasyn jyrtýdy 25 mamyrǵa deıin aıaqtaý jónindegi oblys ákimdiginiń qaýlysyn aýdandyq ákimdikter der kezinde oryndamaı otyrǵanyn atap ótti. Orman aınalasyn jáne basqa da nysandar mańyn jyrtý barlyq aýdandarda birdeı júrgizilip otyrǵan joq, osyǵan oraı TJD bul sharalardy júrgzizý jóninde tıisti eskertý hat joldady. Tekserilgen orman sharýashylyqtarynda órt qaýipsizdigi erejeleriniń normalary buzylǵany úshin 12 laýazymdy tulǵaǵa 382,7 myń teńge mólsherinde aıyppul salyndy.
Sýdaǵy qaterli oqıǵalardyń aldyn alý qajettigin talqylaı kelip, óńir basshysy halyq arasynda túsindirý jumystaryn kúsheıtý qajettigin atap kórsetti. «Talas aýdanynda alty jasar bala sýǵa batyp bara jatqan kezde oǵan 12 jasar apasy kómektesýge umtyldy. Ekeýi de qazaǵa ushyrady. Otbasy bir sátti eki birdeı balasynan aıyryldy. Bul úlken qaıǵy, - dedi K.Kókirekbaev. - mundaı jaǵdaı qaıtalanbaýy tıis. Halyq arasynda túsinik jmystaryn kúsheıtý kerek, BAQ árkimge qaýipsizdik erejelerin eske alyp otyrýy qajet»
Keńes qorytyndysymen oblys ákimi oblystyq qurylymdarǵa qoǵamdyq tártipti ustap turý jónindegi kúsh-jigerdi úılestirip otyrýǵa tapsyrma berdi.
