Jambyl oblysynda jaıaý júrginshiler kinásinen jolda 8 adam qaza tapqan
TARAZ. QazAqparat – Jambyl oblysynda jyl basynan beri jaıaý júrginshilerdiń kinásinen 113 jol-kólik oqıǵasy oryn alǵan, dep habarlaıdy QazAqparat tilshisi.
Jol-kólik apattary saldarynan 8 adam qaza taýyp, 109 adam túrli jaraqat aldy. Sonyń ishinde kámeletke tolmaǵandardyń qatysýymen 39 jol-kólik oqıǵasy tirkelip, 42 bala zardap shekti.
«Aǵymdaǵy jyldyń 4 aıynyń qorytyndysy boıynsha jaıaý júrginshilerdiń jáne jol qozǵalysynyń ózge de qatysýshylarynyń jol júrý erejelerin buzǵany úshin Qazaqstan Respýblıkasynyń Ákimshilik quqyq buzýshylyq týraly kodeksiniń 615-baby boıynsha 3 338 quqyq buzýshy ákimshilik jaýapkershilikke tartyldy», - delingen oblystyq Polıtsııa departamenti baspasóz qyzmetiniń habarlamasynda.
Tártip saqshylary azamattardy jol júrý erejelerin qatań saqtaýǵa shaqyryp, qaýipsizdik sharalaryn buzbaýdy eskertedi.
