Jambyl oblysynda jas sýretshiler men qolóner sheberleriniń baıqaýy ótti
TARAZ. QazAqparat – Jambyl oblysynyń 80 jyldyq mereıtoıyna oraı Yqylas Dúkenuly atyndaǵy Taraz qalalyq Mádenıet úıinde sýretshiler men qolóner sheberleriniń baıqaýy ótti, dep habarlaıdy QazAqparat tilshisi.
Óńirdiń torqaly toıy men «Shahrıstan» etno-mádenı kesheniniń boı kóterýi qurmetine arnalǵan shara barysynda «Kóne Taraz qolónershileri» atty 11-16 jas aralyǵyndaǵy jas sýretshiler baıqaýy, «Taraz – qolónershiler qalasy» atty 16-21 jas aralyǵyndaǵy jas qolónershiler saıysy uıymdastyryldy.
Oblys ákimdigi týrızm basqarmasy ótkizgen sharany atalǵan basqarmanyń «Taraz týrızm» týrıstik aqparattyq ortalyǵy» mekemesiniń basshysy Ulan Joldyqululy sóz sóılep ashyp, jas sheberlerge sáttilik tiledi. Sondaı-aq, beıneleý óneri boıynsha qazylar alqasynyń tóraǵasy Aıdarhan Sıhaev, qolónershiler boıynsha qazylar alqasynyń tóraıymy Sáýle Rysbaeva sóz sóılep, júrekjardy lebizderin bildirdi. Munan soń talapkerlerdiń kórmege ákelgen jumystarymen tanysý kezeńi bastaldy.
Qalalyq Mádenıet úıiniń foıesine qoıylǵan týyndylardyń bárinen óńirdiń 80 jyldyǵyna, túrlengen Tarazǵa degen qurmet baıqalady. Tarazdaǵy Nazarbaev zııatkerlik mektebiniń oqýshysy Sara Turarovanyń «Jaıaýlaý», oblys ortalyǵyndaǵy №21 orta mektep oqýshysy Jasulan Janbolatulynyń «Tarıhı keseneler», Tarazdaǵy №29 orta mekteptiń oqýshysy Dilnaz Sháıdikárimniń «Dombyra» qolóner jumysy da sátti shyqqan. Sol sekildi, №44 orta mekteptiń oqýshysy, halyqaralyq «Shabyt» baıqaýynyń І oryn ıegeri Gúlnaz Amangeldıevanyń «Gúldene ber, Tarazymnyń almasy», «Taraz tabıǵaty» sýretteri jáne «Ejelgi Taraz» qolóner buıymdary da erekshe nazar aýdartty.
«Súıikti qalamyz Tarazdyń kúnnen-kúnge qulpyrǵany qýantady. Sondyqtan bul baıqaýǵa Taraz shahary týraly eńbekterimmen qatystym. Jetekshim Roza Jantóbetovaǵa rahmet», – deıdi jas sheber Gúlnáz Amangeldıeva.
Jambyl polıtehnıkalyq joǵary kolledjiniń stýdenti Álııa Jarylqasynnyń sýretteri men qolóner jumysy da kópshilikti súısintti. Ol bul dodaǵa «Ulttyq mýzykalyq aspaptar» taqyrybymen shıden toqyǵan eńbegimen qatysqan. Munda ár qazaq úshin qasterli dombyra, qobyz aspaptary, túrli oıý-órnekter beınelengen. Onyń sheber qolynan shyqqan «Jambyl Jabaev» portreti de kópshiliktiń nazaryn aýdardy.
Bul baıqaýdyń qorytyndysy jeltoqsan aıynyń basynda oblystyń 80 jyldyǵyna arnalǵan is-sharalarda shyǵarylyp, úzdikter marapattalmaq.
