Jambyl oblysynda jalǵan qalyńdyq qolǵa tústi
TARAZ. QazAqparat – Jambyldyq polıtseıler birneshe ret jalǵan neke qıyp, alaıaqtyqpen aınalysyp kelgen Aıgúl Nııazovany qolǵa túsirdi, dep habarlaıdy QazAqparat.
Jalǵyz basty er azamattarmen nekege otyryp, onyń týystaryn óziniń alaıaqtyq «quryǵyna» túsirip otyrǵan 48 jasar Aıgúl Moldazqyzyna buǵan deıin izdeý jarııalanǵandyǵy týraly habarlanǵan bolatyn.
Áıel egde jastaǵy jalǵyz basty er adamdardyń senimine kirip, jalǵan neke qıyp otyrǵan. Nemese óz aılasyn asyrǵansha azamattyq neke turǵan. Keıin týystaryn jumysqa ornalastyramyn, memlekettik baǵdarlama boıynsha turǵyn úı alamyz degen jeleýmen aqsha surap alatyn bolǵan.
Alaıaq hanym buǵan deıin birneshe márte sotty bolǵan. 2017 jyly kezekti qylmysynan keıin bostandyqqa shyqqan ol baıaǵy ádetine taǵy basqan. Jańatas qalasynyń 52 jastaǵy er adamymen azamattyq nekege otyrǵan Aıgúl azamattyq kúıeýiniń týǵan-týystaryn taqyrǵa otyrǵyzǵan. Olarǵa memlekettik baǵdarlama boıynsha Tarazda qymbat emes páter alýǵa kómektesemin dep, aqshalardy jınap alyp, taıyp turǵan.
Qazirgi ýaqytta polıtsııada tórt ótinish bar, onyń ishinde úsheýi - Sarysý aýdanynyń turǵyndarynan jáne bireýi semeılik er azamattan. Krımınaldyq polıtsııa basqarmasy qyzmetkerleriniń aıtýynsha, zardap shekkenderdiń sany artýy múmkin.
Kúdikti azamatshaǵa kezekti ret izdestirý jarııalanǵannan keıin jelidegi sýretterdi tanyǵan Taraz qalasynyń turǵyny dereý 102-ge qońyraý soǵyp, Aıgúldiń ornalasqan mekenjaıy týraly habar bergen. Osylaısha qylmysker qolǵa túsken. Turǵynnyń belsendiligi úshin departament mamandary alǵys bildirdi.
«Qylmysqa qarsy kúres – bul búkil qoǵamnyń isi, al halyqtyń kómegi osy qarama-qaıshylyqta sheshýshi ról atqarýǵa qabiletti. Polıtsııa departamenti barlyq jambyldyqtardy kez-kelgen kúdik týǵyzatyn oqıǵa týraly ishki ister organdaryna dereý habarlaýǵa shaqyrady. Tek osylaı, birge, biz ómirimizdi tynysh ári qaýipsiz ete alamyz. Eger siz osy áıeldiń alaıaqtyq áreketterinen zardap shekken bolsańyz, Sizge ishki ister organdaryna kelip, ótinish jazý qajet»,- delingen oblystyq polıtsııa departamentiniń baspasóz qyzmetiniń málimdemesinde.
Qazirgi ýaqytta ustalǵan neke alaıaǵy Taraz qalasynyń tergeý ızolıatoryna qamaýǵa alyndy. QR QK 190-baby 3-bóligimen alaıaqtyq boıynsha sotqa deıingi tergeý bastaldy.
https://kaz.inform.kz/news/zhambyl-oblysynda-zhalgan-kalyndyk-eldi-zar-iletip-zhur_a3557590
