Jambyl oblysynda zamanaýı mádenıet úıi ashyldy
TARAZ. QazAqparat – Jambyl oblysy Baızaq aýdany Jalǵyztóbe aýylynda 90 oryndyq zamanaýı Mádenıet úıi paıdalanýǵa berildi, dep habarlaıdy QazAqparat tilshisi.
Aýyl turǵyndaryna tamasha tartý bolǵan mádenıet úıiniń ashylý saltanatyna aýdan ákimi Nurjan Nurjigitov arnaıy qatysyp, barsha aýyl turǵyndaryn aıtýly qýanyshymen quttyqtady.
«Bıyl «Aýyl – el besigi», «Jumyspen qamtýdyń jol kartasy», «Aýmaqtardy damytý» baǵdarlamasy aıasynda, aýdanǵa 13 mıllıard teńge kóleminde qarajat bólinip, aýdandaǵy úsh eldi mekenge Mádenıet úıi, eki eldi mekenge sport kesheni salynyp, segiz eldi mekenge aýyz sý tartylyp otyr. Barlyq salada kóptegen jumys atqaryldy. Tek qana jol salasyn alar bolsaq, bıyl 160 shaqyrym jolǵa asfalt tóseldi. Bir ǵana Jalǵyztóbe aýyldyq okrýgine 187 mıllıon teńge kóleminde qarjy baǵyttalyp, oǵan aýylǵa kireberistegi 10 gektar jerge 54 aýyl azamatyna berilgen jer telimine aýyz sý men tabıǵı gaz qubyry júrgizildi»,-dedi N.Nurjigitov.
Sondaı-aq, aýdan ákimi el ıgiligine berilgen jańa nysannyń aldaǵy ýaqytta aýyl halqynyń rýhanı suranysyn qanaǵattandyryp, jastardyń damýy men tynyǵýyna septigin tıgizer mádenıet oshaq bolatynyna senim bildirdi.
Óz kezeginde aýyl turǵyndary atynan el aǵasy Arystan Moldashev, merdiger «QazMunaıGaz» jaýapkershiligi shekteýli seriktestiginiń dırektory Aıdar Rahymberdıev quttyqtaýyn arnady.
Lenta qııý rásimi oryndalyp, aq jaýlyqty analar shashý shashty. Kelgen qonaqtar ǵımarat ishin aralady.
Zamanaýı talaptarǵa saı boı kótergen ǵımaratta 90 oryndyq kórermen zaly, kitaphana, úıirme zaly, taǵy basqa aýyl turǵyndarynyń mádenı demalysyna qajetti múmkindikter qarastyrylǵan.
Jalpy smetalyq quny 104 mıllıon 734 myń teńge bolatyn nysandy «QazMunaıGaz» jaýapkershiligi shekteýli seriktestigi salǵan.
Ǵımarattyń jalpy aýdany - 398 sharshy metr. Qazandyq gaz júıesine qosylǵan.
