Jambyl oblysynda zamanaýı dene shynyqtyrý-saýyqtyrý kesheni ashyldy
TARAZ. QazAqparat – Jambyl aýdany Asa aýylynda «Aýyl – el besigi» baǵdarlamasy aıasynda salynǵan zamanaýı dene shynyqtyrý-saýyqtyrý kesheni paıdalanýǵa berildi, dep habarlaıdy QazAqparat tilshisi.
Keshenniń ashylý salatanatyna arnaıy qatysqan Jambyl oblysynyń ákimi Berdibek Saparbaev aýyl turǵyndaryn aıtýly oqıǵamen arnaıy quttyqtady.
Aımaq basshysy aǵymdaǵy jyly sportty damytýǵa alty mıllıard teńge bólingenin aıtty. Jyl sońyna deıin 11 keshen esigin aıqara ashady, taǵy bireýi kelesi jyly paıdalanýǵa berilmek. Budan bólek oblysta 92 sport alańshasy salynýda.
«Memleket barlyq jastaǵy turǵyndardy sportqa tartý úshin qolaıly jaǵdaı jasaýda. Búgingi tańda oblys turǵyndarynyń 31 paıyzy dene shynyqtyrýmen jáne sportpen júıeli túrde aınalysady. Bul kórsetkish óse túsýde. Elbasy Nursultan Nazarbaev iri aýyldarda sport nysandaryn salý týraly tapsyrma bergen bolatyn. Jańa saýyqtyrý-saýyqtyrý ortalyǵy «Aýyl - el besigi» memlekettik baǵdarlamasy aıasynda boı kóterdi. Munda balalar sporttyń on túrimen shuǵyldana alady. Keshende jattyqqan jastar aldaǵy ýaqytta belgili sportshyǵa aınalyp, elimizdiń abyroıyn asqaqtatatynyna senimdimin. Sizderdi jańa keshenniń ashylýymen shyn júrekten quttyqtaımyn», - dedi oblys ákimi.
Berdibek Saparbaev basqa da mańyzdy salalardaǵy jetistikterge toqtalyp ótti. Aǵymdaǵy jyly ár túrli memlekettik baǵdarlamalar aıasynda Jambyl oblysyn damytýǵa qosymsha 8 mıllıard teńge qarastyrylǵanyn aýyldyq turǵyndar bári birdeı bile bermeıdi. Degenmen, olar aýyldardaǵy sýmen jáne gazben qamtý, joldardy jóndeý, áleýmettik nysandar salý máseleleriniń júıeli túrde sheshilip jatqanyna kýá bolýda.
Aýyl aqsaqaldary turǵyndardyń memleket qamqorlyǵyn sezinip otyrǵandyǵyn atap ótti. Aýyldyqtar jańa dene shynyqtyrý-saýyqtyrý kesheniniń tamasha tartý bolǵanyn mereılene jetkizdi.
Keshen qurylysyna 590 mıllıon teńgeden astam qarajat bólingen. Munda sport súıer turǵyndar boks, kúres, shaǵyn fýtbol, tennıs, voleıbol, basketbol oınaı alady. Júgirý jolaǵy men jattyǵý zaldary da qarastyrylǵan.
«Barlyq zaldar tańerteńnen keshke deıin, ásirese demalys kúnderi de ashyq bolýy kerek. Keshende túrli deńgeıdegi jarystar ótkizýge barlyq jaǵdaı jasalǵan. Biz bul múmkindikti tıimdi paıdalanýymyz kerek», - dep tapsyrdy oblys ákimi sport basqarmasynyń basshysy Nurbol Júnisbekovke.
