Jambyl oblysynda vaktsına úıde salyna bastady
TARAZ. QazAqparat – Jambyl oblysynda dárigerler koronavırýsqa qarsy vaktsınany turǵyndardyń úıine baryp sala bastady, dep habarlaıdy QazAqparat tilshisi.
Bas memlekettik sanıtarııa dárigeriniń 27 mamyrdaǵy № 23 qaýlysyna sáıkes múgedekter qataryndaǵy múmkindigi shekteýli adamdar úshin koronavırýs ınfektsııasyna qarsy vaktsınatsııalaý úıde júrgiziledi. Olardyń qatarynda egde jastaǵylar, sozylmaly aýrýlary bar naýqastar bar.
Osyǵan oraı, Jambyl oblysynda koronavırýs ekpesin úıge baryp salýǵa arnalǵan mobıldi top jumys isteı bastady. Alǵashqylardyń biri bolyp mundaı qyzmetti paıdalanǵandardyń biri – 69 jastaǵy Ýrýza apaı. Ýrýza Áýelbekova – 30 jyldan astam ýaqyt boıy qant dıabetimen aýyrady jáne joǵary qysymy bar. Ekinshi toptaǵy múgedek. Óz betimen júre almaǵandyqtan, ekpeni úıinde salýǵa kelisken.
Qarııany aldymen medıtsınalyq tekserýden ótkizip, analızine qarap shyqqan dárigerler oǵan Hayat-Vax vaktsınasyn saldy. Aldaǵy ýaqytta ekpeniń ekinshi komponenti de úıde egiledi. Sondaı-aq, qarııany turǵylyqty meken-jaıy boıynsha emhana baqylaýyna aldy. Ýrýza apa úıine kelip, densaýlyǵyn tekserip, ári indetten saqtaıtyn ekpeni salyp bergen mamandarǵa alǵys aıtty.
«Men teledıdardaǵy jańalyqtan kórip, egde jastaǵy jáne múgedek turǵyndarǵa úıge kelip salýǵa bolatynyn estı sala, emhanaǵa habarlastym. Olar maǵan birden kelisim berdi. Mine, búgin maǵan dárigerler úıime kelip ekpe salyp berdi. Bul - men sııaqty óz betimen júrip-tura almaıtyndarǵa óte yńǵaıly eken», - dedi keıýana.
Aıta keteıik, mobıldi egý brıgadasynyń quramynda terapevt dáriger men medbıke bar. Vaktsına salar aldynda adamnyń qan qysymy men júrek soǵysy tekseriledi. Eger barlyq kórsetkish qalypty bolsa, onda ekpe salýǵa bolady jáne patsıent úı jaǵdaıynda 30 mınýt dárigerdiń baqylaýyna alynady.
«Biz vaktsınany úılerge baryp sala bastadyq. Halyqty ımmýndaý naýqany bastalǵaly beri bizdiń medıtsınalyq emhanada 5 300-den astam adam vaktsınatsııalandy. Janama áserler baıqalǵan joq. Biz halyqty ekpemen qamtýdy keńeıtýdi josparlap otyrmyz. Endi múmkindigi shekteýli jandardyń jáne sozylmaly aýrýlary bar adamdardyń ótinishine qaraı olardyń úıine baryp ekpe egemiz. Ári qaraı da onyń densaýlyǵyn baqylaýǵa alamyz», - deıdi «Januıa» emhanasynyń terapevti Gaýhar Dónenbaeva.
