Jambyl oblysynda vaktsına salý 20 egý bólmesinde júrgiziledi
TARAZ. QazAqparat – Jambyl oblysynda koronavırýsqa qarsy vaktsınatsııalaý 20 egý bólmesinde júrgiziledi, dep habarlaıdy QazAqparat tilshisi.
Alǵashqylardyń biri bolyp vaktsına qabyldaǵan Jambyl oblystyq densaýlyq saqtaý basqarmasynyń basshysy Áset Qalıevtiń aıtýynsha, oblys boıynsha vaktsınatsııa qajetti tońazytqysh quraldarymen jabdyqtalǵan 20 egý bólmesinde júrgiziletin bolady. Naqtyraq aıtsaq, Taraz qalasyndaǵy toǵyz emhanada, Shý qalasy jáne 10 aýdannyń emdeý mekemelerinde júzege aspaq. Ol úshin 140-tan astam maman arnaıy oqýdan ótken. Vaktsınatsııa protsesi densaýlyq saqtaý basqarmasy men sanıtarlyq-epıdemıologııalyq qadaǵalaý departamentiniń qatań baqylaýynda bolady.
«Men óz erkimmen keldim, ózimdi jáne týystarymdy koronavırýstyq ınfektsııadan qorǵaǵym keledi. Aýrý óte qaýipti, oǵan kúndelikti kózim jetýde. Sondyqtan barshańyzdy osy vaktsınatsııalaýǵa jaýapkershilikpen qaraýǵa shaqyramyn»,-deıdi ótken jyldyń mamyr aıynan bastap «qyzyl aımaqta» jumys istep kele jatqan oblystyq kópbeıindi balalar aýrýhanasynyń reanımatolog dárigeri Oljas Kenjebaev.
«Vaktsına qabyldaý qajet. Men alǵashqylardyń biri bolyp kelip otyrmyn, basqalar bizden úlgi alady dep úmittenemin», - deıdi Jambyl oblysy boıynsha Ulttyq saraptama ortalyǵynyń asa qaýipti ınfektsııalar zerthanasynyń meńgerýshisi Márııamkúl Qulataeva.
Shtattan tys bas epıdemıolog Gýlı Myrzabekovanyń aıtýynsha, aqpan aıynda vaktsınany bes myń adam qabyldaıdy. Jalpy, birinshi jartyjyldyqta 100 myń jambyldyqqa egý josparlanǵan. Aǵymdaǵy jyldyń ekinshi jartyjyldyǵynan bastap klınıkalyq zertteýlerdiń úshinshi kezeńi aıaqtalǵannan keıin otandyq QazCovid-in preparatymen vaktsınatsııalaý bastalady.
