Jambyl oblysynda úzdik ustazdar ulyqtaldy
TARAZ. QazAqparat – Jambyl oblysynda muǵalimder kúnine oraı «Ustaz mártebesi – El mereıi» atty saltanatty kesh ótti, dep habarlaıdy QazAqparat.
Tarazdaǵy «Balasaǵun» ortalyq kontsert zalynda teatrlandyrylǵan kórinisten bastaý alǵan merekelik keshte ustazdar týraly ánder oryndalyp, bıden shashý shashyldy.
«Qazir Jambyl jerinde 25 myńnan astam muǵalim pedagogtik qyzmetpen aınalysýda. Bul úlken eńbek dep bilemin. Sondyqtan sońǵy jyldary muǵalimderdiń bilim salasyndaǵy osy tabystary respýblıka kóleminde kóptep kórinýde. Mysaly, óńirimizde barlyǵy 31 muǵalim «Úzdik pedagog» atansa, 1200-den asa pedagog halyqaralyq, respýblıkalyq baıqaýlarǵa qatysyp, júldeli oryn alǵan. Bıylǵy túlekterdiń 75 paıyzǵa jýyǵy joǵary oqý oryndaryna túskeni de osyndaı qajyrly eńbektiń jemisi ekendigi sózsiz», – dedi oblys ákiminiń orynbasary Sulýshash Qurmanbekova quttyqtaý sózinde.
Sondaı-aq aımaq basshysynyń orynbasary úzdik ustazdardy marapattady.
Atap aıtqanda, T.Rysqulov aýdanyndaǵy «Abaı atyndaǵy shaǵyn ortalyqty orta mektebi» Kommýnaldyq memlekettik mekemesiniń dırektory Aıtken Abıshov pen Baızaq aýdany Ǵ.Muratbaev atyndaǵy mektep-gımnazııacynyń qazaq tili men ádebıeti pániniń muǵalimi Naılıa Iskakova «QR Bilim berý isiniń qurmetti qyzmetkeri» tósbelgilerimen marapattaldy.
Al Jambyl aýdany Tóle bı atyndaǵy orta mekteptiń dırektory Janat Shardarbekova «Y.Altynsarın» tósbelgisiniń ıegeri atandy.
Sonymen qatar «Úzdik pedagog-2019» oblystyq konkýrsynyń nátıjesi shyǵaryldy. Bas júldeni Taraz qalasy erekshe daryndy balalarǵa arnalǵan mamandandyrylǵan «Daryn» mektep-ınternatynyń matematıka pániniń muǵalimi Muhtar Talqanbaev ıelenip, oǵan 500 myń teńge tabys etildi. Sondaı-aq birinshi, ekinshi oryn ıegerleri men túrli nomınatsııalar boıynsha jeńimpazdar anyqtalyp, olarǵa 100-300 myń teńgelik sertıfıkattar berildi. Barlyǵy 15 muǵalim marapattaldy.
Budan bólek, 12 ustaz oblys ákiminiń Qurmet gramotasyna ıe boldy.
Saltanatty sharada jıylǵan kópshilikke baldyrǵandar LED ekran arqyly jyly lebizderin bildirdi. «Ustazym meniń, ustazym» heshteginen úzindiler kórsetilip, ártúrli mamandyq ıeleriniń quttyqtaýlary berildi.
Aıta keteıik, sońǵy jyldary oblys pedagogtary kóptegen jetistikterge qol jetkizgen. Máselen, bıylǵy «Úzdik pedagog – 2019» respýblıkalyq konkýrsynda atalmysh ataqqa jambyldyq 4 ustaz laıyq dep tanylǵan. Olardyń qatarynda Jambyl aýdany B.Besbaev atyndaǵy mektep-gımnazııasynyń orys tili men ádebıeti pániniń muǵalimi Aıgúl Qalmahanova, Baızaq aýdany Ǵanı Muratbaev atyndaǵy gımnazııanyń qazaq tili men ádebıet pániniń muǵalimi Baqyt Kúderıeva, Erekshe daryndy balalarǵa arnalǵan mamandandyrylǵan «Daryn» mektep-ınternatynyń matematıka pániniń muǵalimi Muhtar Talqanbaev jáne Qulan agrotehnıkalyq kolledjiniń veterınarlyq oqytýshysy Erkebulan Ertaev bar.
Al osy úzdikterdiń ishinde Aıgúl Qalmahanovanyń kandıdatýrasy «Álem pedagogi» baıqaýyna usynylyp otyr.
