Jambyl oblysynda úzdik sportshylarǵa páter kiltteri tabystaldy

TARAZ. QazAqparat – Jambyl oblysynyń ákimi Berdibek Saparbaev Olımpıada oıyndarynyń júldegeri Eldos Smetov pen júzýden paralımpıadanyń qola júldegeri Nurdáýlet Jumaǵalıǵa 1 bólmeli páter kiltterin tabystady, dep habarlaıdy QazAqparat tilshisi.

Óńir basshysy memleket tarapynan dene shynyqtyrý men sportty belsendi túrde damytýǵa jan-jaqty qoldaý kórsetilip jatqanyn atap ótti.

«Memleket basshysy Qasym-Jomart Toqaevtyń tapsyrmasyna sáıkes ár ýaqytta sportty, kúresti qoldaımyz. Sport qoldaý tapsa, sańlaqtar shyńdalyp, el abyroıyn kóteredi. Búginde jambyldyqtar óziniń sporttyq jetistikterimen aýyz toltyryp maqtana alady. Áýlıeata óńirinen osy kúnge deıin ataǵy alysqa taraǵan chempıondar men rekordtardy jańartqan shoqtyǵy bıik talaı sportshylar shyqqan. Jerlesterimiz túrli deńgeıdegi jarystarda joǵary nátıjelerge qol jetkizýde. Sportshylar men olardyń jattyqtyrýshylaryna sáttilik tileı otyryp, Qazaqstannyń sportyn odan ári bıik shyńdarǵa kótere berýlerińizdi tileımin», - dedi B.Saparbaev.

Óz kezeginde sportshylar memleket tarapynan jasalyp jatqan qoldaýǵa alǵystaryn bildirip, elimiz ben oblysymyzdyń sportyn jańa beleske shyǵarýǵa aıanbaı ter tógetindikterin jetkizdi.

«Aldaǵy ýaqytta da jeńis tuǵyrynan kóriný úshin barymdy salatyn bolamyn. Búgin Almaty qalasyna baryp, arnaıy tekseristen ótemin. Sodan soń, Qyrǵyzstannyń Shopan ata qalasynda oqý-jattyǵý jıynyn ótkizip, bıylǵy jyly ótetin Azııa oıyndarynda, aldaǵy Álem birinshiliginde úzdik atanýǵa kúsh jumsaımyn», - dedi N.Jumaǵalı.