Jambyl oblysynda usha almaı qalǵan sırek kezdesetin birqazan qutqaryldy
TARAZ. QazAqparat – Jambyl oblysynda polıtseıler Qyzyl kitapqa engizilgen, sırek kezdesetin birqazan qusyn qutqardy, dep habarlaıdy QazAqparat tilshisi.
Jýaly aýdandyq polıtsııa bólimine Dıqan aýylynyń shetindegi jyrada úlken erekshe qustyń ushyp kete almaı turǵandyǵy jóninde habarlama kelip túsken. Bul týraly oblystyq polıtsııa departamentiniń baspasóz qyzmeti habarlady.
Atalǵan jerge kelgen polıtsııa qyzmetkerleri jyra boıynan óte álsiz jáne ózdiginen ushyp kete almaıtyn dármensiz birqazandy kórgen. Birqazan joıylyp bara jatqan qus retinde Qyzyl kitapqa engizilgeni belgili.
«Jýaly aýdanynyń orman jáne janýarlar dúnıesin qorǵaý mekemesinen shaqyrylǵan mamandardyń kelýin kútken polıtsııa qyzmetkerleri sırek kezdesetin qusty ańdyǵan ıtterden qorǵaǵan. Qutqarylǵan qus jýyq arada Shymkent qalasynyń haıýanattar baǵyna jiberiledi», - delingen habarlamada.
