Jambyl oblysynda úsh jylda 12 mektep salynady

TARAZ. QazAqparat - Jambyl oblysynda «Jaıly mektep» ulttyq pılottyq jobasyn iske asyrý aıasynda 2023-2025 jyldary oblysta 9500 oqýshyǵa arnalǵan, quny 61 mıllıard 165 mıllıon teńgeni quraıtyn jańa formattaǵy 12 mektep salynady, dep habarlaıdy QazAqparat tilshisi.

Jambyl oblysy ákiminiń orynbasary Erbolat Ibraıhanovtyń aıtýynsha, Baızaq, Jambyl, Merki aýdandarynyń árqaısysynan – 1, Tarazdan – 4, Qordaı aýdanynan – 3, Shý aýdanynan – 2 jaıly mektep boı kóteredi. Bul mektepterdiń jeteýiniń qurylysy bıylǵa, beseýiniń qurylysy 2024 jylǵa josparlanǵan.

Jalpy, jaıly mektepterdiń basqa mektepterden aıyrmashylyǵy, onda pándik kabınetter men zarthanalarmen qamtý, joǵary jáne bastaýysh synyp oqýshylary úshin bólek oqý bloktary men sport zaldarynyń bolýy, erekshe bilim berý qajettilikteri bar balalar úshin barlyq jaǵdaılar qarastyrylady.

Aıta keteıik, buǵan deıin Tarazda jyl basynan beri 75 oqýshy úıinen qashyp ketkenin jazǵan bolatynbyz. Taraz qalasynyń prokýrory Nurjan Boranbaevtyń aıtýynsha, úılerinen qashqan jetkinshekterdiń 44-i qyz bala bolsa, 31-i ul. Jalpy, Taraz qalalyq polıtsııa basqarmasynyń profılaktıkalyq esebinde 161 kámeletke tolmaǵan jasóspirim tur.