Jambyl oblysynda úsh forel sharýashylyǵy iske qosyldy
Jambyl oblysynyń ákimi Berdibek Saparbaev Jambyl aýdanyna jumys saparymen baryp, Jasórken aýylyndaǵy «ArNur» JK jańa forel sharýashylyǵymen tanysty. Kásipker Rýslan Saýranbaev 2019 jyldan bastap balyq ósirýmen aınalysýda. Munda jylyna 90 tonna tuqy tuqymdas balyq óndiriledi, kelesi jyly olardyń qataryna 60 tonna forel qosý josparlanyp otyr. Osy maqsatta kóp uzamaı Almatydan 125 myń forel shabaǵy jetkizilmek.
«Biz qosymsha jer alyp, onda tórt basseın saldyq, onyń birine 70 myń shabaq jiberildi. Olar júıeli jáne sapaly ósý úshin kóp uzamaı ártúrli sý qoımalaryna taratylady. Men foreldi ósirý tehnologııasyn óz betimmen zerttep shyqtym. Bolashaqta temperatýrany, sýdaǵy ottegi deńgeıin baqylaı alatyn maman daıyndaýdy josparlap otyrmyn», - dedi ol.
Búgingi kúni shabaqtardyń salmaǵy shamamen 40 grammdy quraıdy, al bes aıdyń ishinde olar 150-ge deıin ósýi kerek. Kásipker kelesi jyly taǵy bir basseın salýdy kózdep otyr. Al bolashaqta ystaıtyn oryn men muzdatqysh kameralar ornatpaq.
«Balyq sharýashylǵy salasyna memleketten jaqsy sýbsıdııalar qarastyrylýda. Jumys nátıjeleri boıynsha sharýalar esep beredi, oǵan sáıkes memleket azyq-túlik shyǵyndarynyń 30-50 paıyzyn tóleıdi. Óndiris kólemin eskersek, bul aıtarlyqtaı somany quraıdy. Jaqyn arada Jambyl oblysynda osy salany jańa deńgeıge kóterýge baǵyttalǵan segiz forel sharýashylyǵy iske qosylady», - dedi tabıǵı resýrstar jáne tabıǵat paıdalanýdy retteý basqarmasynyń basshysy Aslan Orazbekov.
Sondaı-aq, sharýashylyq aýmaǵynda semınar ótip, oǵan qatysýshylar salanyń bolashaǵy men balyq ósirýdi damytýdyń aldaǵy josparlaryn talqylady.
«QR Premer-Mınıstri Asqar Mamın Jambyl oblysyna jumys sapary barysynda bizdiń aımaqtyń áleýetiniń joǵary ekenin atap ótken bolatyn. Sý qoımalarynyń kóptigi buǵan deıin qaltarysta qalyp kelgen balyq óndirisin belsendi damytýǵa múmkindik beredi. Búgingi tańda Qulan agrotehnıkalyq kolledjinde 15 adam osy mamandyq boıynsha úsh aılyq kýrstan ótip jatyr. Degenmen, eger biz úlken jetistikke jetemiz desek, onda búkil oblys úshin kadrlardy daıarlaýda bir ǵana bilim berý mekemesimen shektelip qalmaý kerek», - dedi aımaq basshysy.
Aslan Orazbekov Jambyl oblysynda forel ósiretin úsh ferma iske qosylǵanyn basa aıtty. Onyń ekeýi - Qordaı aýdanynda, bireýi - Jambyl aýdanynda. Jaqyn arada osy sekildi taǵy bes kásiporyn ashylady dep kútilýde eken.
«Bul sharýashylyq úshin 20 ózen usynyldy. Onyń altaýy T.Rysqulov aýdanynda, tórteýi Qordaıda jáne Merki men Jýaly aýdandarynda bes ózenen. Ondaǵy sýdyń temperatýrasy men quramy forel ósirýge óte qolaıly. Taraz gýmanıtarlyq-ınnovatsııalyq ýnıversıtetimen «Balyq sharýashylyǵy» mamandyǵyn oqytýdy qoljetimdi baǵdarlamalar qataryna qosý týraly kelissózder júrgizilýde», - dedi ol.
Berdibek Saparbaev balyq aýlaý salasyn sýbsıdııalaý men yntalandyrý jónindegi ázirlenip jatqan memlekettik baǵdarlamalar týraly aıtty.
Balyq sharýashylyǵyn ashý nemese keńeıtýge 20 mıllıon teńgege deıin qaıtarymsyz granttar men jeńildetilgen nesıeler beriledi. Eger qazir oblys jylyna shamamen myń tonna forel óndirýge qaýqarly bolsa, 2025 jylǵa deıin óndiristi úsh esege, al 2030 jylǵa qaraı jylyna bes myń tonna forel óndirý josparlanýda.
«Sizderge bul oraıda balyq sharýashylyǵy jáne demalys uıymdastyrý sekildi eki tıimdilikti qatar damytýǵa múmkindik bar. Mysaly, munda demalýǵa arnalǵan 11 kúrke ornatylǵan. Adamdar ári demalyp, ári balyq aýlaıdy. Ózderi aýlaǵan balyq úshin aqy tóleıdi», - dep qosty B.Saparbaev.
Semınar barysy Qulan kolledjiniń bes túlegine sertıfıkattar tabystaýmen túıindeldi.
