Jambyl oblysynda úsh aıda 24 sybaılas jemqorlyq qylmysy jasalǵan
QR Sybaılas jemqorlyqqa qarsy is-qımyl agenttiginiń oblys boıynsha departament basshysy Ádilhan Áshirbaevtyń aıtýynsha, birinshi toqsanda 24 sybaılas jemqorlyq quqyq buzýshylyǵy tirkelgen. Bul ótken jyldyń sáıkes kezeńimen salystyrǵanda 40 paıyzǵa az.
Shyǵyn 65,1 mıllıon teńgeni qurap, onyń 58,7 mıllıon teńgesi óndirildi. Vedomstvo óz qyzmetindegi basty nazardy aldyn alý jumysyna aýdaryp otyr.
Jalpy, 2015-2025 jyldarǵa baǵyttalǵan sybaılas jemqorlyqqa qarsy strategııa aıasyndaǵy 2018-2020 jyldarǵa arnalǵan is-sharalar jospary aıaqtaldy.
Desek te, ketken kemshilikter de joq emes. Aıtalyq, Talas aýdanyndaǵy servıstik ákimdik naqty is júzinde jumys istemeı kelgen.
Halyqqa qyzmet kórsetýge arnalǵan zaldardyń jaı-kúıi syn kótermeıdi.
Qoǵamda sybaılas jemqorlyqqa qarsy ımmýnıtetti qalyptastyrý boıynsha aqparattyq toptardyń jumysy álsiz, keıbir jerde ondaı toptar múlde qurylmaǵan.
Olardyń quramyndaǵy úkimettik emes uıym ókilderi men qoǵam belsendileri sanaýly ǵana.
Memlekettik satyp alý, jer telimderin berý jáne áleýmettik kómek kórsetý salalary sybaılas jemqorlyqqa asa beıim baǵyttarǵa jatady.
Ádilhan Áshirbaev laýazymdy tulǵalardyń atqarylǵan jumys aktilerine qol qoıýyna ishki aýdıt qyzmetiniń baqylaýyn kúsheıtýdi, jer komıssııalarynyń otyrystaryn aýdıo jáne beınejazbalar arqyly ótkizýdi, ataýly áleýmettik kómek taǵaıyndaý men berý protsesin avtomattandyrýdy usyndy.
Aımaq basshysy Taraz qalasynyń ákimi Erjan Jylqybaevqa birden bes qyzmetkeri tártiptik jaýapkershilikke tartylǵan jumyspen qamtý jáne áleýmettik baǵdarlamalar bóliminiń jumysyn jeke nazarǵa alýdy tapsyrdy.
Bul T.Rysqulov jáne Talas aýdandarynyń ákimderine de qatysty. Aýyl sharýashylyǵy basqarmasynyń basshysy Qaırat Amanovqa sharýalardyń memlekettik sýbsıdııalardy jyl saıyn bir sharýa qojalyqtar alady degen shaǵymdaryn jiti qaraý júkteldi.
QR Memlekettik qyzmet isteri agenttiginiń oblys boıynsha departament basshysy Sultanhan Shákir memlekettik qyzmetshiler arasyndaǵy sybaılas jemqorlyqqa qatysty jaǵdaılar týraly baıandady.
Oblystyq máslıhat depýtaty, TIGÝ rektory Erbolat Saýryqov memleket pen qoǵam arasyndaǵy senimniń tómendeýiniń basty sebebi – sybaılas jemqorlyq ekenin atap ótti.
Onyń pikirinshe, barlyq basqarmalar men departamentterde aldyn alý jumystaryn kúsheıtý qajet. Aıtalyq, TIGÝ stýdentter úıinde parasat dúkeni ashylyp, stýdentter arasynda onyń tanymaldylyǵy arta túsipti.
Jastar senim, adaldyq jáne parasattylyq sııaqty adamı qundylyqtardi boıǵa sińirýde.
Sonymen qatar, halyq qalaýlysy quqyq buzýshylyq jasaǵan sheneýnikterdi qyzmetinen bosatýdy, al monıtorıngtik toptardyń quramyna depýtattardy qosýdy usyndy.
«Adamdar ózderin qaýipsiz sezinýi kerek. Bılik organdarynyń basty mindetteriniń biri – qylmys deńgeıiniń ósýine jol bermeý jáne sybaılas jemqorlyqtyń barlyq kórinisterimen kúresý. Azamattyq sektor ókilderin túrli komıssııalar men mobıldi toptarǵa kóbirek tartý qajet. Memlekettik qyzmettegi bos laýazymǵa tańdalatyn úmitkerler qatań irikteýden ótýi mańyzdy. Eń aldymen moraldyq-etıkalyq ólshemderge sáıkes bolýy tıis», - dedi Berdibek Saparbaev.
