Jambyl oblysynda úsh aıda 2 tonnaǵa jýyq esirtki tárkilendi
Oblystyq Polıtsııa departamentiniń baspasóz qyzmetinen málim etkendeı, bıylǵy 1 maýsymda bastalǵan «Qarasora - 2020» jedel aldyn alý sharasynyń úsh aıy ishinde Jambyl oblysynda esirtkige qatysty 209 fakti anyqtaldy.
Atap aıtsaq, 209 faktiniń 30-y QR QK 296-baby 4-bóligi boıynsha (esirtki quraldaryn asa iri mólsherde saqtaý), 12 fakti QR QK 297-baby boıynsha (esirtki quraldaryn ótkizý), 2 fakti QR QK 286-baby boıynsha (esirtki quraldarynyń kontrabandasy), 22 fakti QR QK 300-baby boıynsha (quramynda esirtki bar ósimdikterdi ósirý), 85 fakti QR QK 296-baby 1-bóligi boıynsha (esirtki quraldaryn paıdalaný), 44 fakti QR QK 296-baby 2-bóligi boıynsha (esirtki quraldaryn ótkizý maqsatynsyz zańsyz saqtaý), 14 fakti QR QK 296-baby 3-bóligi boıynsha (esirtki quraldaryn iri mólsherde zańsyz saqtaý) rastalǵan», - delingen vedomstvo habarlamasynda.
Barlyǵy zańsyz aınalymnan eki tonnaǵa jýyq túrli esirtki zattary tárkilengen. Onyń ishinde 1 tonna 900 keliden astam marıhýana, 27,5 kelige jýyq gashısh, 1 keli sıntetıkalyq esirtki jáne 2 kelige jýyq kanabıs shaıyry bar.
Sondaı-aq, jýyrda ǵana, ıaǵnı, 8 qyrkúıek kúni Jambyl oblysy PD JPB qyzmetkerleri «Batys Eýropa-Batys Qytaı» trassasynda JPD-men birlesip Lada Grant avtokóligin toqtatyp, tekseris barysynda Baron atty qyzmettik ıt 32 jastaǵy almatylyq júrgizýshiden salmaǵy 226,5 gramm gashısh pen 820 gramm keptirilgen marıhýanany tapqan.