Jambyl oblysynda ulttyq sport túrleri damytylady
TARAZ. QazAqparat - Jambyl oblysynda QR Tuńǵysh Prezıdenti kúnine arnalǵan kókpardan eresekter arasyndaǵy oblystyq ashyq týnır óz máresine jetti, dep habarlaıdy «QazAqparat» HAA tilshisi oblys ákimdiginiń dene shynyqtyrý jáne sport basqarmasynyń baspasóz qyzmetine silteme jasap.
«Ulttyq sportty damytyp, ata-babamyzdyń mura etken baǵa jetpes qazynasyn dáripteı otyryp, salaýatty ómir saltyn nasıhattaýǵa, sondaı-aq úzdik sportshylar men sáıgúlik baptaıtyn atbegilerdi anyqtap, oblys quramasyn jasaqtaý maqsatynda uıymdastyrylǵan bul sharanyń jastardyń kúshi men eptiligin arttyryp, batyldyq pen erlik qasıetterin damyta túseri anyq», - deıdi uıymdastyrýshylar.
Kókpardan eresekter arasyndaǵy oblystyq ashyq týnırge Qazaqstan Respýblıkasynyń Ulttyq qurama komandasynyń bas bapkeri Qýanyshbek Quramaev pen álemdik deńgeıdegi saıystardyń jeńimpazdary men júldegerleri qatysty. Merekelik sharany Merki aýdany ákiminiń orynbasary Marat Jarylqasynuly ashty.
Merki aýdanynyń Tátti aýylyndaǵy at jarysynda oblys aýdandarynan kelgen 216 sportshy 18 komandaǵa birigip oınady. Sporttyq shara «Rýhanı jańǵyrý» baǵdarlamasynyń aıasynda ótkizildi.
Jarys qorytyndysy boıynsha Merki jáne Baızaq aýdandarynyń komandalary alǵa shyqty. Birinshi oryn men basty syılyq merkilik «Tátti» komandasyna buıyrdy. «Merki» komandasynyń sportshylary ekinshi bolsa, Baızaq aýdanynyń «Baızaq datqa» komandasy úshinshi orynǵa taban tiredi.
Týrnırdiń úzdik oıynshysy retinde «Tátti» komandasynyń múshesi Abylaıhan Nyshanbek tanyldy. Barlyq jeńimpaz kýboktar, medalder men dıplomdarmen jáne baǵaly syılyqtarmen marapattaldy. Atap óterlik jaıt, oıynnyń jeńimpazy atanǵan "Tátti aýly" komandasynyń kapıtany Ashat Almetov aýyspaly kýbokty kelesi jyly Shý aýdanynda ótkizý úshin "Saýytbek-Shý" komandasynyń kapıtany Qýanysh Toıshybaevqa tabystady.
Jambyl óńirinde ulttyq sport túrleri belsendi damyp keledi. Uıymdastyrýshylardyń aıtýynsha, kókpar oıyny ulttyq sport oıynynyń osy túrin jastar arasynda keńinen nasıhattaý úshin ótkizilgen. Komandalar óz sheberlikterin kórsetip, budan da joǵary deńgeıli týrnırlerge qatysý múmkindigine ıe bolýda.
