Jambyl oblysynda ultaralyq qatynastardy nyǵaıtý qalaı júrgizilýde
Baǵdarlamany iske asyrý shıelenistiń yqtımal oshaqtaryn anyqtaýdan bastalǵan. 25 eldi mekenge túrli sebepterge baılanysty atqarýshy bıliktiń qosymsha nazary qajettigi belgili bolyp otyr. Bul eldi mekenderge arnaıy qurylǵan bes monıtorıngtik top músheleri baryp, halyqpen kóptegen kezdesýler ótkizgen. Júzdesýler nátıjesi boıynsha shuǵyl sheshýdi qajet etetin ózekti máseleler anyqtalǵan.
Oblys ákimimen ótken kezdesýde atalǵan top jetekshileri aqparattyq-túsindirý, áleýmettik máseleler, aýyldaǵy kásipkerlikti damytý, dinı jáne quqyqtyq máseleler boıynsha atqarylǵan jumystar týraly esep berdi.
Aqparattyq-nasıhat tobyn basqarǵan ishki saıasat basqarmasynyń basshysy Daýyl Beısenqulov «Beıbitshilik pen kelisim» jobasyn iske asyrý boıynsha Jol kartasyna engen 89 tarmaqtyń Qordaıdaǵy jaǵdaıdy turaqtandyrýǵa qatysty 27-tarmaǵy oryndalǵanyn, 50-i oryndalý ústinde ekenin habarlady. Al, qalǵan altaýynyń merzimderi uzartylsa, taǵy altaýy boıynsha qosymsha qarjy qajet.
Basqa aýdandardaǵy eldi mekenderge keletin bolsaq, onda aýqymdy áleýmettik zertteýler
júrgizilip, sonyń negizinde anyqtalǵan máselelerdi sheshý boıynsha sharalar qabyldanbaq.
Basqa toptardyń jetekshileri – jumyspen qamtýdy úılestirý jáne áleýmettik baǵdarlamalar basshysy Jorabek Baýbekov, din isteri basqarmasynyń basshysy Jangeldi Omarov, kásipkerlik jáne ındýstrııalyq-ınnovatsııalyq damytý basqarmasy basshysynyń orynbasary Erkin Atymtaev, oblys prokýrorynyń orynbasary Rýslan Isaev ta anyqtalǵan máseleler haqynda toqtalyp ótti. Atap aıtqanda, jumys oryndarynyń tapshylyǵy, aýyz sý jáne sýarmaly sýmen qamtýdaǵy qıyndyqtar, jaıylymdardyń jetispeýshiligi, úı jáne sharýa qojalyqtarynyń ónimderin ótkerýdegi túıtkilder, quqyq qorǵaý organdaryna jáne medıtsınalyq kómektiń sapasyna baılanysty shaǵymdar.
Sondaı-aq, áleýmettik máseleler jónindegi top jetekshisi Jorabek Baýbekovtiń aıtýynsha,
kezdesýler qorytyndysy boıynsha 83 adam aqyly qoǵamdyq jumystarǵa, 50 adam jastar
praktıkasyna jiberilgen. Al, 1025 adam bıznes-ıdeıalaryn júzege asyrýǵa qaıtarymsyz granttarǵa, 58 adam shaǵyn nesıelerge qol jetkizgen.
Sonymen birge J.Baýbekov aýyl turǵyndarynyń kóptegen máselelerdi sheshýge yqpal etetin
memlekettik baǵdarlamalardan habarsyz ekendigin tilge tıek etti. Buǵan ishinara qoǵamdyq-saıası jańalyqtarǵa onsha qyzyǵýshylyq tanytpaıtyn jergilikti turǵyndardyń ózderi de kináli. Spıker eldiń áleýmettik-ekonomıkalyq damýy men azamattardyń ál-aýqatyn jaqsartýǵa baǵyttalǵan memlekettik baǵdarlamalardyń múmkindikterin aýyl turǵyndaryna túsindiretin arnaıy nasıhat toptaryn qurýdy usyndy. Bul usynysty oblys ákimi qoldady.
«Beıbitshilik pen kelisim» jobasy boıynsha kóptegen jumystar atqarylǵan desek te, jıynǵa
qatysýshylar sheshilmegen máselelerge kóbirek nazar aýdardy.
«Biz qaqtyǵystardyń qalaı aldyn alýǵa bolatynyn túsindik, beıbit jolmen sheshilgen kezder de boldy. Alaıda, mundaı jaǵdaılar múldem týyndamaýy tıis, ol úshin kóp nárse atqarylýy kerek.
El basshylyǵy bul máselelerge jiti nazar aýdaryp otyr», - dep atap ótti Berdibek Saparbaev.
Turǵyndar senimsizdik bildiretin jergilikti atqarýshy organdardyń basshylaryna, teologııalyq bilimi álsiz ımamdarǵa taǵy basqalarǵa qatysty shaǵymdar aıtyldy.
«Kóbine jergilikti deńgeıdegi ákimderdiń dármensizdiginen qabyldanǵan sheshimder nátıjesiz bolady. Budan bylaı aýdan ákimderinen atqarylǵan jumystar týraly naqty sandar men faktiler, aýyldyq okrýg ákimderiniń esepterin únemi tyńdap otyrýdy talap etemin», - dep eskertti B.Saparbaev.
Keńes qorytyndysy boıynsha oblys ákimi jaýapty tulǵalarǵa tapsyrmalar júktedi. Olardyń oryndalý barysy kelesi basqosýlarda talqylanatyn bolady.
