Jambyl oblysynda týysyn san soqtyrǵan alaıaq áıel ustaldy
TARAZ. QazAqparat – Jambyl oblysy Sarysý aýdanynda alaıaqtyqpen aınalysqan 34 jastaǵy azamatsha ustaldy, dep habarlaıdy QazAqparat tilshisi.
Jambyl oblysy Sarysý aýdandyq polıtsııa bólimine Jańatas qalasynyń eki turǵyny alaıaqtyq deregi boıynsha aryzdanǵan.
Aryzda olar biriniń týysy, ekinshisiniń tanysy bolyp keletin azamatsha qaıtarymsyz 5 mıllıon teńge nesıe alyp beremin dep senimine kirip, árqaısysynan 100 myń teńgeden, jalpy 200 myń teńge qarajatty aldap alyp, óz qajetine jaratyp jibergenin kórsetken.
Atalǵan derek boıynsha Qylmystyq kodekstiń 190-babymen sotqa deıingi tergep-tekserý amaldary bastaldy.
Polıtsııa qyzmetkerleri jedel-izdestirý sharalary barysynda 34 jastaǵy Jańatas qalasynyń turǵynyn ustady.
Ol eshqaıda jumys jasamaıdy jáne qaıtarymsyz nesıe alyp beretin múmkindigi joq, al atalǵan aqshany ózine kerek bolǵan sebepti aldap ıemdengenin moıyndady.
«Qazirgi ýaqytta adamdardyń sengishtigi men ońaı oljaǵa qol jetkizgisi keletinin paıdalanyp, ózderiniń utymdy usynystarymen qarapaıym azamattardy azǵyratyn alaıaqtar qatary kóbeıgen. Bir ǵana Sarysý aýdanynyń ózinde bir aptanyń ishinde 7 alaıaqtyq deregin ashtyq, olardyń bári sotqa joldanatyn bolady. Polıtsııa bóliminde alaıaqtyq qylmystaryna qarsy arnaıy jumys toby quryldy. Jergilikti turǵyndarǵa da alaıaqtyq derekteriniń aldyn alý joldaryn túsindirip, tekserilmegen aqparatqa senbeýdi udaıy eskertýdemiz» - dep atap ótti Sarysý APB bastyǵy Ashat Almetov.
