Jambyl oblysynda týrıstik nysandardyń sany 65-ke jetip, 45 jańa baǵdar ázirlendi
Aldaǵy ýaqytta 3 jyl ishinde shet el jáne otandyq týrıster sanyn kem degende 20 paıyzǵa kóbeıtý kózdelip otyr.
Jambyl oblysy týrısterdi birden-bir qyzyqtyra alatyn, kóne eskertkishteri mol, týrızmdi damytýda úlken múmkindikteri bar ólke ekeni sózsiz.
«Aǵymdaǵy jyly oblys ákimi Berdibek Saparbaevtyń tapsyrmasyna sáıkes «Jambyl oblysynda týrızm salasyn damytýdyń 2020-2022 jyldarǵa arnalǵan strategııalyq jospary» ázirlendi. Bul jospar bizge aldaǵy jyldardaǵy negizgi mindetterdi aıqyndap berdi», - dep málim etti búgin «ÓKQ» aqparat alańynda ótken brıfıng barysynda Jambyl oblysy ákimdigi týrızm basqarmasy basshysynyń mindetin atqarýshy Jomart Hajy baıandady.
«Birinshi kezekte qazirgi zamanǵy týrıstik ınfraqurylymdy odan ári keńeıtý maqsaty tur. Qazirgi tańda oblys aýmaǵynda ornalasqan týrıstik nysandarda abattandyrý jumystary júrgizilýde.
«Bınazar», «Qyrbas», «Quralaı sulý» kesenelerine alyp baratyn avtojoldardyń aqaýlyq aktileri jasalyndy. Shý aýdany aýmaǵynda ornalasqan «Balasaǵun» qalashyǵyna aparatyn avtojol salý qurylysynyń jobalyq-smetalyq qujattamalary ázirlenip, kelesi jyly qoldanysqa berilýi kútilýde»,-dedi Jomart Hajy.
Spıkerdiń aıtýynsha, bıyl negizgi týrıstik nysandardyń sany 37- den 65-ke kóbeıip, 45 jańa týrıstik marshrýt ázirlengen. Olar boıynsha kelesi jyly týrısterge ekskýrsııalyq-aqparattyq, uıymdastyrýshylyq qyzmet kórsetetin, kásibı daıarlyqtan ótken gıd-ekskýrsovodtardyń sanyn Jambyl oblysynyń ákimdigi men oblystaǵy joǵary oqý oryndary arasyndaǵy týrızm salasynda yntymaqtastyq ornatý boıynsha memorandýmdarǵa sáıkes 50-ge deıin arttyrý josparlanyp otyr.
Sondaı-aq, uzaq merzimdi jobalarǵa materıaldyq resýrstar salýǵa daıyn bıznes ókilderin yntalandyrý boıynsha jaǵdaılar jasaý qajettigi aıtyldy.
«Oblys aýmaǵyndaǵy respýblıkalyq mańyzy bar avtomobıl joldary boıynda 63 servıs nysany ornalasqan, onyń ishinde 35 nysan Qazaqstan Respýblıkasynyń ulttyq standartynyń talaptaryna sáıkes keledi, al 28 nysan boıynsha sáıkestendirý jumystary jalǵasýda.
Sonymen qatar, «Batys Eýropa – Batys Qytaı» kólik dálizi boıynda 8 servıs kesheniniń qurylysy josparǵa endi»,- dedi J.Hajy.
