Jambyl oblysynda túngi reıd: Polıtsııaǵa 120 jasóspirim jetkizildi
TARAZ. QazAqparat – Jambyl oblysynda túngi reıd barysynda ishki ister organdaryna 120 jasóspirim jetkizildi, dep habarlaıdy QazAqparat tilshisi.
Tártip saqshylary túngi kóńil kóterý mekemeleri boıynsha jasóspirimderdi izdestirýge qatysty kezekti reıdtik is-sharalar júrgizdi. Birneshe kún ishinde polıtseıler kóshede jáne oıyn-saýyq oryndarynda bolǵan kámeletke tolmaǵan 120 jasóspirimdi anyqtady.
«Eki jasóspirim mas kúıinde, tórt jasóspirim kafede jáne 116-sy zańdy ókilderiniń erip júrýinsiz turǵyn úıden tys jerde bolǵan. Kámeletke tolmaǵandar arasynda qalanyń jalpy bilim beretin mektepteriniń 8-11 synyp oqýshylary jáne kolledjderdiń 1-kýrs stýdentteri bar. Olardyń árqaısysy ata-analaryna tapsyrylyp, profılaktıkalyq túsindirme júrgizildi. Al birqatyryna qatysty ákimshilik quqyq buzýshylyq týraly hattamalar toltyryldy», – dep habarlady Jambyl oblysy PD bastyǵynyń baspasóz hatshysy Gúlsara Muhtarqulova.
Kámeletke tolmaǵandardyń bes zańdy ókiline qatysty ata-analyq mindetterin tıisinshe oryndamaǵany úshin ákimshilik hattamalar jasaldy. Qylmys jasaǵany úshin eki jasóspirim esepke alyndy. Sondaı-aq, úsh bala turatyn eki qolaısyz otbasy anyqtaldy.
Aıta keterligi, polıtsııa qyzmetkerleri reıd barysynda Taraz qalasy men oblys aýdandarynyń 83-ten astam oıyn-saýyq oryndaryn tekserýmen qamtydy, 255 ata-ana men ózge de eresek adamdar ákimshilik jaýapkershilikke tartyldy.
