Jambyl oblysynda transshekaralyq týrıstik marshrýt quryldy
TARAZ. QazAqparat - Jambyl oblysynda týrızmdi damytýǵa 250 mln teńge bólindi. Bul týraly óńirlik kommýnıkatsııalar qyzmetinde ótken brıfıngte oblys ákimdiginiń týrızm basqarmasynyń basshysy Qarlyǵash Aralbekova aıtty, dep habarlaıdy QazAqparat ZhambylNews-ke silteme jasap.
Jambyl oblysy ekonomıkasynyń basym baǵyttarynyń biri - týrızm. Josparlanǵan maqsat pen mindetterge qol jetkizý úshin oblystyń oń týrıstik ımıdjin qalyptastyrý jáne týrıstik aǵymdy tartý úshin qajetti ınfraqurylymmen qamtamasyz etý jumystary júrgizilýde.
Qarlyǵash Ámirqyzynyń aıtýynsha, jalpy somasy 5,4 mlrd teńgeni quraıtyn birqatar nysandar qurylysy bastalady. Onyń ishinde 5 qonaq úı, 5 meıramhana, 2 kıiz úı qalashyǵy jáne úlken úmit artylyp otyrǵan taý-shańǵy bazasy bar. Investorlar, metsenattar, qarjy ınstıtýttary arqyly tartylǵan qarajat esebinen 5 týrıstik aımaq qurylýda, olar - «Qaralma» taý-shańǵy bazasy, Shahrıstan aýmaǵyndaǵy «Kóne Taraz sheberleri» qolónershiler qalashyǵy, «Tórtkól» kerýen saraıyndaǵy «Qazaq aýyly» tarıhı-mádenı ortalyǵy, «Aısha Bıbi» jáne «Qarahan» keseneleri men «Áýlıe Bastaý» saýyqtyrý orny kiretin tarıhı-arheologııalyq keshen, «Aqyrtas» saraı kesheni.
Sondaı-aq, aǵymdaǵy jyly transshekaralyq týrıstik marshrýttardy damytý boıynsha Qyrǵyzstan memleketiniń Talas jáne Ystyqkól oblystaryn Jambyl oblysymen baılanystyratyn «Uly Jibek jolyndaǵy týrızm» transshekaralyq týrıstik marshrýty quryldy. Biryńǵaı marshrýt aımaǵymyzǵa qosymsha týrısterdi tartýǵa múmkindik beredi.
