Jambyl oblysynda tórt túlikti asyldandyrý jumystary bastalady

TARAZ. QazAqparat - Jambyl oblysy Turar Rysqulov aýdanynyń Kókdónen aýylynda tórt túlikti asyldandyrý sharalary bastalady, dep habarlaıdy QazAqparat tilshisi.

Bul týraly Jambyl oblysynyń ákimi Nurjan Nurjigitov T.Rysqulov aýdanyna jasaǵan issapary barysynda málimdedi.

Oblys basshysynyń aıtýynsha, kókdónendikterde mal basynan keminde 20-30 lıtr sút alýǵa múmkindik mol. Sebebi, taýly aımaqtyń shóbi shúıgin, tabıǵaty mal sharýashylyǵyn damytýǵa qolaıly.

Osy maqsatta Kókdónen aýyldyq okrýginiń turǵyndaryna kelesi jyldyń kókteminen bastap «Asyldandyrý baǵdarlamasy» qoljetimdi bolady. Nátıjesinde et ónimderi de birshama kóbeıýi tıis.

Oblys basshysynyń turǵyndarmen kezdesýi barysynda sondaı-aq, aǵyn sý tapshylyǵy sóz bolyp, baý-baqsha ósirý úshin aýylǵa sý qoımasyn salýǵa usynys berildi.

Aıta keteıik, buǵan deıin Jambylda ıgerilmegen 379 myń gektar jaıylym jer memleket menshigine qaıtarylǵanyn jazǵan bolatynbyz.

Sharýa qojalyqtarynyń jerlerine kedergisiz mal jaıýǵa 510 myń gektarǵa memorandým jasalyp, ıgerilmegen 379 myń gektar jaıylym jer memleket menshigine qaıtaryldy. Nátıjesinde, jetispeıtin jaıylym jerlerdiń kólemi 683,6 myń gektardan 164 myń gektarǵa qysqardy.