Jambyl oblysynda temirjol ótkelderinen 200-den asa aqaý anyqtalǵan
Jambyl oblysynyń aýmaǵynda avtomobıl joldarymen qıylysatyn 84 temirjol ótkeli bar desek, onyń ishinde 57 ótkel retteletin jáne 27-si rettelmeıtin ótkelge jatady.
Oblystyq polıtsııa departamentiniń baspasóz qyzmetiniń habarlaýynsha, temirjol ótkelderin zertteý barysynda olardyń jaı-kúıinen 210 aqaý anyqtalǵan. Bul kemshilikterdi joıý úshin temirjol ótkelderine qyzmet kórsetetin uıymdar basshylaryna 76 nusqaýlyq joldanǵan.
Kóptegen avtokólik júrgizýshileri bos joldy kórip, mejeli jerge tezirek jetýge tyrysyp, temirjol ótkelinen ótý erejelerin qasaqana buzyp jatady. Bul erejeni elemegender ge 27 780 teńge (10 aılyq eseptik kórsetkish) kóleminde aıyppul salynady.
«Temirjol ótkeli – bul qaýipti jer, sondyqtan ol arnaıy jol belgilerimen jabdyqtalýy kerek. Temirjoldy kesip ótý tek belgilengen jerlerde ǵana qoljetimdi. Jyl basynan beri oblysta 119 adam temirjol ótkelderinen ótý erejelerin buzǵany úshin ákimshilik jaýapkershilikke tartyldy. Temir joldardy kesip ótý erejelerin saqtamaǵany úshin aıyppul sanktsııalaryn qoldaný joldardaǵy qaýipsizdikti qamtamasyz etýge jáne adamdardyń ómiri men densaýlyǵyn saqtaýǵa baǵyttalǵan»,-delingen oblystyq polıtsııa departamentiniń baspasóz qyzmeti.
