Jambyl oblysynda táýlik ishinde eki jasóspirim sýǵa ketti
TARAZ. QazAqparat - Ótken táýlikte Jambyl oblysynyń sý qoımalarynda qaıǵyly jaǵdaılar boldy, dep habarlaıdy QazAqparat tilshisi oblystyq Tótenshe jaǵdaılar departamentine silteme jasap.
«16 shilde kúni saǵat 15:40-ta qutqarýshylar Tarazdaǵy «Zerbulaq» demalys ornyndaǵy sýdan jaǵaǵa 13 jastaǵy jasóspirimniń denesin alyp shyqqan. Bala shomylýǵa arnalǵan jerde sýǵa batyp ketken. Sonymen qatar 13 jáne 14 jastaǵy eki qyz qutqaryldy», - delingen vedomstvonyń habarlamasynda.
Kýágerlerdiń aıtýynsha, ul bala ápkesin aman alyp qalamyn dep sońynan sýǵa súńgigen.
Dál sol táýlikte Jambyl oblysy Tótenshe jaǵdaılar departamentiniń jedel qutqarý jasaǵy ata-anasynyń qaraýynsyz qalyp qoıyp, Taraz qalasynyń mańyndaǵy Talas ózenine aǵyp ketken 8 jasar balanyń denesin izdestirýdi bastap ketti.
«Keshki saǵat 21:00-de izdestirý sharalary aıaqtaldy. Ókinishke oraı, nátıje bolmady. Kúnniń jaryq kezinde jalǵastyramyz», - dedi oblystyq TJD ókili.
Jambyl oblysy Tótenshe jaǵdaılar departamentiniń málimetinshe, 2018 jyldyń basynan beri óńirdiń sý qoımalarynda arty qaıǵyǵa ákep soqqan 12 jaǵdaı tirkelgen.
