Jambyl oblysynda Táýelsizdik kúni qarsańynda 28 nysan ashyldy
Jambyl oblystyq ákimdiginiń baspasóz qyzmeti málimdegendeı, mundaı nysandardyń ishinde 12 kóp qabatty turǵyn úı, 7 dárigerlik ambýlatorııa, 4 balalar baqshasy jáne 5 ınfraqurylymdyq nysandar (sýmen jabdyqtaý jáne káriz júıesi) bar.
Tarazda 12 kóppáterli turǵyn úı paıdalanýǵa berildi, onyń ishinde 9-y 15-shi shaǵyn aýdanda, ekeýi - «Báıterek» yqsham aýdanynda ornalasqan. Budan bólek, Shý qalasyndaǵy «Jetisý» turǵyn úı alabynda 75 páterli kóp qabatty turǵyn úı salyndy. Oblystyq ákimdikte atap ótkendeı, Tarazda 462 gektar aýmaqta barlyq qajetti ınfraqurylymy bar eki jańa shaǵyn aýdannyń qurylysy júrgizilip jatyr.
«7-20-25» memlekettik baǵdarlamasy aıasynda munla 480 kóp qabatty jáne 969 jeke turǵyn úılerdiń qurylysy bastaldy. Bıyl 800 páterli 10 kóp qabatty turǵyn úıdi, al 2019 jyly - 1 380 páterli 25 úıdi paıdalanýǵa berý josparlanyp otyr. Tarazda 686 páter osy baǵdarlamanyń aıasynda azamattarǵa berilip jatyr.
Atalyp ótilgendeı, osy kóp qabatty turǵyn úılerdiń birinshi qabaty iskerlik ortaǵa beriledi dep josparlanyp otyr. Jańa 15-shi shaǵyn aýdanda «Táýelsizdik» monýmenti, Neke qııý saraıy, Kongress-holl, atletıkalyq jáne gımnastıkalyq manejder, Halyqqa qyzmet kórsetý ortalyǵy (HQKO), sport kesheni, Muz aıdyny, Qabyldaý úıi, qarjy jáne iri saýda-oıyn-saýyq ortalyǵy boı kóteredi.
Táýelsizdik kúni qarsańynda óńirdegi aýylda memleket esebinen 2 medıtsına mekemesi, 5 - memlekettik-jeke seriktestik aıasynda salyndy. Jambyl oblysyndaǵy aýyldarda jalpy 95 alǵashqy medıtsınalyq kómek kórsetý nysanyn salý josparda bar. Jobany júzege asyrý úshin 6,5 mlrd teńge jáne 7 jyl qajet. Biraq, Memlekettik-jeke seriktestik aıasynda qurylys merzimi 3 jylǵa qysqaryp, bıýdjet 4,2 mlrd teńgege azaıdy. Oblystyq ákimdik 95 medıtsınalyq nysannyń barlyǵy 2020 jylǵa qaraı qoldanysqa beriletinin ýáde etti.
