Jambyl oblysynda taý shatqalyndaǵy órt sóndirildi
TARAZ. QazAqparat - Úsh kúnge sozylǵan órt sóndirý jumystarynan soń Jambyl oblysynda taý shatqalyndaǵy órt sóndirildi, dep habarlaıdy QazAqparat oblystyq TJD-ǵa silteme jasap.
Oblystyq TJD jedel shtaby T. Rysqulov aýdanynyń Aqyrtas aýyldyq okrýgindegi dala órtin sóndirý jumystaryn jalǵastyryp jatyr. Qyrǵyzstanmen shekaralyq aımaqtaǵy jalyndy sóndirý úshin «Qazavıaqutqarý» AQ tikushaǵy 21 tonna sý shashty.
«8 tamyz kúni keshki 18.00 shamasynda órt tutanǵan aımaqty aınala ushyp shyǵyp, órt oshaqtarynyń barlyǵy sóndirilgenine kóz jetkizdik. Órtti sóndirýge 56 adam jáne bes tehnıka jumyldyryldy», - deıdi TJD ókilderi.
Departamenttegilerdiń aıtýynsha, búgin tańǵy bes jarymda 16 qyzmetker órt tutanǵan aımaqtarǵa jiberilgen.
Eske sala keteıik, 5 tamyz kúni Jambyl oblysynyń Aqyrtas aýyldyq okrýginde, Qyrǵyzstannyń Talas oblysymen shekaralyq aımaqta qurǵaq shóp órtengeni týraly habarlanǵan bolatyn. Jalyn 200 gektar aýmaqty sharpyǵan. Tilsiz jaýmen kúresýge oblystyq tótenshe jaǵdaılar departamentiniń 40 qyzmetkeri men úsh tehnıkasy jiberilgen.
Kórneki sýret
