Jambyl oblysynda taý shańǵysy demalys orny salynýda
ASTANA. QazAqparat - Jambyl óńirinde qysqy jáne jazǵy sporttyq demalysqa arnalǵan «Qaralma» taý shańǵysy kesheni salynyp jatyr, dep habarlaıdy QazAqparat tilshisi.
Taraz qalasynan 70 shaqyrym, Jýaly aýdanynyń ortalyǵy Baýyrjan Momyshuly aýylynan 20 shaqyrym jáne Shymkent qalasynan 100 shaqyrym jerde ornalasatyn saýyqtyrý keshenin jyldyń barlyq mezgilinde paıdalanýǵa bolady. Jobany júzege asyrýshylar ony halyqaralyq úzdik standarttar men ekologııalyq normalarǵa saı júzege asyrmaq.
Osydan biraz ýaqyt buryn ǵana adam aıaǵy baspaǵan ıen dalada qazirgi ýaqytta avtomobıl joly kúrdeli jóndeýden ótkizilip, shańǵy trassasyn, aspaly arqan joldar men ózge de qajetti ınfraqurylymdardy salýǵa daıyndyq júrgizilip jatyr. Aspaly joldyń jáne taý shańǵysy trassasynyń syzbasy ázirlengen. Qurylys ornyna aspaly arqan joldardy salýǵa qajetti alyp tirekter, temir arqandar, kabınalar syndy bolashaq taý shańǵysy shıpajaıyna qejetti qural-jabdyqtar jetkizilgen. Demalys ornynyń aýmaǵy 68 gektardy quraıdy.
Ideıa avtorlarynyń aıtýyna qaraǵanda, Qaralma landshafty qysqy ýaqytta taý shańǵysyna, al jazda atpen serýendeý sportyna jaramdy. Bul jerdiń klımaty jazda ystyq, aýa temperatýrasy +30 gradýsqa jetse, qysta -15, -20 gradýs aıaz bolady, 1,2 metr qar túsedi.
Jýaly aýdanynyń ákimi Baqtııar Kópbosynovtyń aıtýynsha, aýdanǵan jumys saparymen kelgen Jambyl oblysynyń ákimi Asqar Myrzahmetov bolashaq shıpajaıdyń geografııalyq ońtaıly ornalasqanyn birden baǵalap, tómen syrǵanaý úshin ońtaıly taý jobalaryn da kórsetip bergen.
«Jambyl oblysynda alǵash ret Jýaly aýdanynda «Qaralma» taý shańǵysy shıpajaıy paıda bolady. Qurylys jumystary júrip jatyr. Qazirgi ýaqytta taý shańǵysy trassasyna qajetti qural-jabdyqtar 100 paıyz jetkizilgen. Áli kúnge deıin ıen jatqan jerge jol salatyn bolamyz. Barlyq kommýnıkatsııany tartý kerek. Jalpy, ınfraqurylymyn 80 paıyzǵa aıaqtadyq, endi kottedjer, qonaq úı men meıramhana salatyn ınvestorlardy kútip otyrmyz. Josparlanǵan 20 kottedjdiń beseýi salyndy. Buǵan qosa, quny 6 mlrd teńgeni quraıtyn qýaty 16 mVt bolatyn sý elektr stansasyn salamyz», - dedi Baqtııar Kópbosynov.
Jalpy usyndyǵy 30 shaqyrymdy quraıtyn aspaly arqan joldar men taý shańǵysy trassasynyń syzbasy ázirlengen. Uzaqtyǵy 9 150 metrdi quraıtyn 4 aspaly arqan jol salý josparda bar. Taýdyń eń bıik núktesi teńiz deńgeıinen 1400-3200 metr joǵaryda tur. Taý yldılarynyń eni men uzyndyǵy qolaıly taý shańǵysy trassasyn salýǵa múmkindik beredi.
«Bul jerde qar bola ma, bolmaı ma dep kúmán keltiretinderge aıtarym, qarashadan bastap bizde mınýs temperatýra bolady jáne jeltoqsannan naýryzǵa deıin qar jatady. ıAǵnı, tórt aı boıy shańǵymen syrǵanaýǵa múmkindik bar. Jáne de bul qysta qary ary ketkende bir apta ǵana jatatyn jáne búkil qys boıy aýa raıynyń + temperatýrada bolatyn Tarazdan 60 shaqyrym ǵana jerde ornalasqan. Búkil álemde barlyǵy da uzyn trassada syrǵanaǵandy qalaıdy. Qazaqstandaǵy Medeý, Shymbulaq, Şýche trassalary qysqa. Al biz Sochıdegi «Qyzyl alańqaıdan» yldıy sál qysqa trassa usyna alamyz», - dedi Jýaly aýdanynyń ákimi.
