Jambyl oblysynda Talas ózenine batyp ketken qyzdyń denesi tabyldy
Qaıǵyly oqıǵa 23 shilde kúni saǵat 17:30-dar shamasynda Taraz qalasyna jaqyn mańdaǵy Jambyl aýdanynda, Jasórken aýylynyń mańynda bolǵan. Nemeresin ertken qart sol kúni Tals ózenine shomylmaq bolyp, sýǵa batyp ketken. Aýyl turǵyndary ózennen er adamnyń denesin shyǵarǵan.
Jambyl oblystyq Tótenshe jaǵdaılar departamentiniń qyzmetkerleri sol kúni qyzdy izdeýdi bastady. Qutqarýshylar qyzdy tún batqansha izdep, 24 shilde kúni tań ata izdeý jumystary qaıta jandandy.
Jambyl oblystyq Tótenshe jaǵdaılar departamenti baspasóz qyzmetiniń habarlaýynsha, izdeý jumystary 24 shilde kúni tańǵy 5:00-den bastalǵan. Oǵan Jambyl oblystyq Tótenshe jaǵdaılar departamentiniń 74 qyzmetkeri men 7 tehnıkasy jumyldyrylǵan. Sondaı-aq izdeý jumystaryna sýǵa batqan qyzdyń týystary men jaqyn mańdaǵy aýyl turǵyndary da astalysty. Qyzdy izdeý týraly áleýmettik jelige jazylǵan habarlamaǵa eriktiler de ún qosyp, kómektesti.
Saǵat 18:10-da qyzdyń denesi tabyldy.
«Qyzdyń denesin sýdyń aǵysy alyp ketken. Іzdeý jumystaryna barlyǵy 200 adam qatysty»,-dep habarlady Jambyl oblystyq Tótenshe jaǵdaılar departamenti baspasóz qyzmetiniń jetekshisi Sáýle Muńatbaeva.
Aıta keteıik, sýǵa batyp ketken er adamnyń jasy 61-de, al nemeresi 7 jasta bolǵan. Qyzdyń ata-anasy jumys izdep ózge elge ketken.
Jambyl oblystyq Tótenshe jaǵdaılar departamentiniń habarlaýynsha, 2021 jyly óńirdiń sý qoımalarynda sýǵa batyp ketkender sany 3,5 esege kemigen.
Osyǵan deıin Jambyl oblysynda er adamnyń nemeresimen birge sýǵa batyp ketkeni habarlandy.