Jambyl oblysynda sýretke túsý úshin vagonnyń ústine shyqqan 20 jastaǵy jigit kúıip qaldy
TARAZ. QazAqparat – Jambyl oblysynda poıyzdyń vagon-tsısternasyna minip, fotoǵa túspek bolǵan Shý qalasynyń 20 jastaǵy turǵyny kúıip qaldy, - dep habarlaıdy QazAqparat Kóliktegi polıtsııa departamentiniń baspasóz qyzmetine silteme jasap.
Bıylǵy jyldyń 24 mamyrynda Shý qalalyq aýrýhanasynyń qyzmetkerinen jedel medıtsınalyq járdem brıgadasynyń kúıik shalǵan jas jigitti shuǵyl jetkizgeni týraly habarlama kelip tústi. Tekserý barysynda polıtseıler zardap shekken azamattyń Shý qalasynyń 20 jastaǵy turǵyny ekenin anyqtady.
«Atalǵan azamat 24 mamyr kúni saǵat 20.30-da fotosýretke túsý úshin Shý stantsııasy parkiniń elektrlendirilgen jolyndaǵy júk poıyzynyń quramynda turǵan vagon-tsısternaǵa órmelep shyqqan. Abaısyzda ol joǵary voltty jeli symyna túsip qalǵan. Nátıjesinde ol 50 paıyz dene jáne aıaq-qolynyń І-ІІ-ІІІ dárejeli elektrotermııalyq kúıigin aldy. Bul fakt QR QK-niń 344-baby 1-bóligi, ıaǵnı, temir jol kóligi qozǵalysynyń qaýipsizdik erejelerin buzý faktisi boıynsha sotqa deıingi tergeýdiń biryńǵaı tiziliminde tirkeldi. Jazataıym oqıǵa boıynsha tergep-tekserý amaldary júrgizilýde»,-delingen KPD baspasóz qyzmetiniń habarlamasynda.
Sondaı-aq, Kóliktegi polıtsııa departamentiniń bastyǵy Ońal Bekeevtiń aıtýynsha, aǵymdaǵy jyldyń basynan beri kólik polıtseıleri temir jol tóseminiń belgilenbegen jerlerinen ótken 9569 azamatty anyqtap, ákimshilik jaýapqa tartqan. Sonymen qatar, adamdardyń bolýyna baılanysty poezdardy shuǵyl tejeýdiń 184 faktisi tirkelgen. Onyń ishinde aǵymdaǵy kezeńde temir jol kóliginen jaraqat alýdyń 44 faktisi tirkelip, ókinishke qaraı onyń jartysynan qaıtys boldy.
«Temir joldar – jeke qaýipsizdik talaptaryn saqtaǵan azamattar úshin qaýipti emes. Árbir azamat qaýipsizdik talaptaryn tolyq oryndaýǵa mindetti. Bul óz densaýlyǵy men ómiri úshin óte mańyzdy», - dedi polıtsııa polkovnıgi.
