Jambyl oblysynda sý qoımasy jańbyr sýyna tolyp qaldy
TARAZ. QazAqparat - Jambyl oblysy Jýaly aýdanynda qutqarýshylar damba arqyly sý qoımasyna kelgen sýdy toqtatty, dep habarlady «QazAqparat» HAA tilshisi.
Jambyl oblysy TJD baspasóz qyzmetinde túsindirgendeı, 13 sáýirde Jýaly aýdanynda «Qońyrtóbe-1» sý qoımasy jańbyr sýyna tolyp qalǵany tirkeldi.
«Qysqa merzimde aǵyn sý qaýpiniń aldy alyndy. 650 qappen bekitildi. Qazir sý deńgeıi 80 santımetrge tústi», - dedi vedomstvodan.
Qaýipti joıýǵa aýdandyq TJB, ákimdikten, jedel qutqarý jasaǵynan 76 adam, 8 birlik tehnıka jumyldyryldy.
Jambyl oblysynda sý tasqynyna qarsy sharalar aıasynda gıdrotehnıkalyq qurylystardy qalpyna keltirý, ózen jaǵalaryn nyǵaıtý, qurylystardy vızýaldy tekserý júrgizilýde. Sý qoımalarynda kúndelikti kezekshilik uıymdastyrylyp, sý tasqynyna qarsy shtabtar, jedel top quryldy, 48 birlik arnaıy tehnıka ázirlikke keltirildi.
«Qazgıdromet» RMK 14 sáýirde jaýyn-shashyn saldarynan Jambyl oblysynda taýdyń tómengi jaǵyndaǵy ózende sý tasýy múmkin ekenin eskertedi.
