Jambyl oblysynda sý qoımalaryndaǵy qutqarý jumystaryna jumyssyzdar tartyldy
TARAZ. QazAqparat - Jambyl oblysynda sý qoımalarynda reıd júrip jatyr, onda sýdan qutqarý jumystaryna jumyssyzdar tartylýda, dep habarlady Taraz ákimdigine silteme jasap «QazAqparat» HAA tilshisi.
«Jyl basynan bastap Tarazda óz úıine jaqyn mańda alty jasar bala sýǵa batyp ketti. Árıne, qaıǵyly jaǵdaı. Ata-analary balalarynyń qaıda júrgenin, kez-kelgen jerde sýǵa túsý qaýipti ekenin bile tura, olarǵa tyıym salmaıdy. Sondyqtan qutqarýshylar balalaryn qaraýsyz qaldyrmaý úshin túrli tásilmen ata-analarynyń sanasyna jetkizýge tyrysýda», - dedi brıfıngte qala ákiminiń orynbasary Maqsat Ahaev.
«Sý qoımalarynda shomylýǵa qaýipti jerler aıqyndaldy. Talas ózeni jaǵasyna - «Tekturmas» kesheni aýdanyndaǵy kópir mańyna, «Bóbek» saýyqtyrý ortalyǵy, Qazkentke jaqyn kópir mańynda, Shóldala turǵyn úı alqabynda tyıym salý belgileri ornatyldy. Budan basqa, qaýipti ýchaskelerde qutqarý postary quryldy. Qutqarý jumystaryna jumyssyz retinde tirkelip, sýdan qutqarý qyzmetterinde arnaıy daıyndyqtan ótken 26 adam tartyldy», - dedi Maqsat Ahaev.
Oblystyq prokýratýra derekterine sáıkes shomylý maýsymy bastalǵan sátten bastap óńir sý qoımalarynda 18 adam sýǵa ketti, onyń 12-si bala.
