Jambyl oblysynda sý elektr stantsııasy salynyp jatyr
TARAZ. QazAqparat - Jambyl oblysy Jýaly aýdanyndaǵy Kóksaı kanalynyń boıynda sý elektr stantsııasynyń qurylysy júrip jatyr, dep habarlaıdy QazAqparat.
Joba quny 5 mıllıard teńge bolatyn 18 megavattyq sý elektr stantsııasynyń qurylys jumystary 2019 jyldyń maýsym aıynda aıaqtalyp, iske qosylady dep kútilýde.
Aldaǵy ýaqytta onda barlyǵy 4 sýdan toq óndirý stantsııasy salynbaq. Qazirgi tańda 2 stantsııanyń negizi qalanyp, betondaý jumystary atqarylýda.
«Qurylys jumystaryn 3-qarashada bastaǵanbyz. Keler jyldyń jazynda aıaqtaýdy maqsat etip otyrmyz. Kúnniń sýyǵyna qaramastan jumysty júıeli túrde júrgizý úshin 3000 myńdaı tekshe metr topyraqty shyǵaryp, arnaıy jertóle qazyp aldyq. Tsementteý jumystaryn úsikke uryndyrmaı, sonda jasap jatyrmyz. Barlyǵy 60 jumysshy eńbek etýde»,- deıdi qurylys proraby Qanat Ábdirahmanov.
Eske sala keteıik, Elbasy Nursultan Nazarbaev 2050 jylǵa qaraı qazaqstandyqtar tutynatyn elektr energııasynyń jartysy balamaly jolmen óndirilýi kerektigin tapsyrǵan bolatyn. Búginde Prezıdent júktegen jumys júzege asyrýda Jambyl oblysy respýblıka boıynsha kósh bastap keledi. Kúnnen, jelden jáne sýdan energııa óndiretin 168 megavattyq 10 stantsııa bar. 2020 jylǵa deıin oblysta bolashaq energııa kózderin arttyrýǵa baǵyttalǵan taǵy 5 nysan salynady dep josparlanǵan.
Sonymen qatar, erteń aımaqta «Býrnoe solar- 2» kún elektr stantsııasy iske qosylady dep kútilýde. Bul buǵan deıin jumys istep turǵan kún elektr stantsııasynyń ekinshi kezeńi bolyp esepteledi. Osy boıynsha stantsııanyń qýaty eki esege artyp, 100 Mvt-qa keńeıtiledi. Jobanyń quny 25 mıllıard teńgeni quraıdy. Quryltaıshy - «Samruk Kazyna - United Green» jaýapkershiligi shekteýli seriktestigi. Stantsııada «jinko Solar» (QHR) kompanııasynyń 185 174 fotoelektrlik modýli, Sungrow (QHR) óndirisiniń 16 ınvertorlyq stantsııasy ornatylǵan. Aıta keteıik, stantsııanyń qurylys kezeńinde 300-ge jýyq jumysshy tartylǵan bolatyn. Al paıdalaný kezeńinde 45 jańa jumys orny ashyldy. Joba elektr energııasyn óndirýdiń ekologııalyq taza ádisin qarastyrady. Elektr energııasynyń jyldyq boljamdy óndirisi - 78,2 mln kVt*saǵ quraıdy, bul shamamen 40 myń turǵyn úıdi elektr energııasymen qamtamasyz etýge múmkindik beredi. Elbasynyń pármenimen iske qosylatyn kún elektr stantsııasy Jýaly aýdanyndaǵy Nurlykent aýylynyń mańy, Batys Qytaı - Batys Eýropa avtomagıstraliniń boıynda ornalasqan. Ekinshi kezeńde salynǵan nysannyń aýmaǵy 74 gektar jerdi alyp jatyr.
Ǵıbrat Sembaı
