Jambyl oblysynda shopan ıesiniń 61 jylqysy men 169 qoıyn satyp jibergen
Aǵymdaǵy jyldyń 15 naýryzynda Baızaq aýdanynyń polıtsııa bólimine Taraz qalasynyń turǵyny fazendasynan iri qara jáne usaq maldardyń joǵalǵany týraly aryzdanǵan. Ol ótken jyldyń qarasha aıynan bastap maldar shopannyń baǵýymen Baızaq aýdanyndaǵy jaıylymda bolǵandyǵyn aıtqan. 12 naýryzda ol fazendaǵa kelip, 61 jylqysy men 169 qoıdyń joq ekenin kórgen. Jábirlenýshige keltirilgen zalal 36 mıllıon 680 myń teńgeni quraıdy.
«Atalǵan derekke qatysty Qazaqstan Respýblıkasy Qylmystyq kodeksiniń 189-baby 4-bóligi ıaǵnı asa iri mólsherde senip tapsyrylǵan bóten múlikti ıemdený nemese ysyrap etý boıynsha sotqa deıingi tergeý amaldary bastaldy. Bul bap boıynsha múlki tárkilenip, jeti jyldan on eki jylǵa deıingi merzimge bas bostandyǵynan aıyrýǵa jazasy qarastyrylǵan»,-delingen oblystyq polıtsııa departamenti baspasóz qyzmetiniń habarlamasynda.
Sondaı-aq, vedomstvonyń málimetinshe, polıtsııa qyzmetkerleri kúdikti retinde 40 jastaǵy shopandy ustap, ýaqytsha ustaý ızolıatoryna qamaqqa alǵan. Kúdikti óz kinásin tolyq moıyndaǵan. Qajetti saraptamalar taǵaıyndaldy.