Jambyl oblysynda shegirtke 63 myń gektar jerge taraldy
ASTANA. QazAqparat - Búgin selektorlyq rejimdegi Úkimet otyrysynda Jambyl oblysynyń ákimi Kárim Kókirekbaev óńirde shegirtkeniń taralýy jaǵdaıy týraly baıandady, dep habarlaıdy QazAqparat.
«Oblystyń jeti aýdany aýmaǵyndaǵy 63 myń gektar alqapta shegirtkeniń taralýy tirkeldi, onyń ishinde 82 paıyzy úsh aýdannyń aýmaǵynda taralǵan. Qazirgi kezde shegirtke jaıylǵan jerlerdi hımııalyq óńdeý júrip jatyr. Búginde 40 myń gektardan astam aımaq óńdeldi, jalpy 121 myń gektar jerdi qamtý josparlanǵan»,-dedi oblys ákimi.
Onyń sózine qaraǵanda, birlesken ǵylymı-zertteý jumystaryn júrgizý úshin oblysqa elimizdiń joǵary oqý oryndarynan, sondaı-aq AQSh pen Italııadan mamandardyń delegatsııasy keldi.
Kárim Kókirekbaevtyń aıtýynsha, jalpy óńirde epızootııalyq sharalardy ótkizý úshin 1 mlrd. 300 mln. teńge bólindi. Oblys aýmaǵynda veterınarlyq sharalardy 11 kommýnaldyq memlekettik kásiporyn júrgizedi. Onda 688 maman qyzmet etýde.
