Jambyl oblysynda sharap óndirisi qaıta qolǵa alyndy
TARAZ. QazAqparat -Jambyl oblysynda óndirilgen júzim sharaby qazaqstandyq naryqqa qaıta shyǵa bastady, dep habarlaıdy QazAqparat tilshisi Jambyl oblysy ákimdiginiń aýyl sharýashylyǵy basqarmasyna silteme jasap.
Jambyl oblysy buryndary júzim ósirýmen jáne sharap jasaýmen aınalysqan Qazaqstannyń úsh óńiriniń biri bolǵan. Óblystaǵy júzim alqabynyń jalpy aýmaǵy 8 myń gektardan astam jerdi alyp jatty. Onda 5 sharap zaýyty jumys jasaǵan. Olardyń barlyǵy 90-jyldary jabylǵan. Artynan Shaıquryq jáne Úsharal aýyldaryndaǵy sharap óndirýshi kásiporyndar da qırap, túgi qalmaǵan. Al oblys ortalyǵy men Qarasaı, Jasórken jáne Merki aýyldaryndaǵy ǵımarattar qaıta jóndeýden ótip, jańa tehnıkany qajet etken.
2015 jyldan bastap Merki aýdanynyń Aqaral aýyldyq okrýginiń «Aq Aral» óndiristik kooperatıvi jergilikti sharap zaýytyn qaıta jóndeýge jáne sharap óndirisine arnalǵan shıkizat bazasyn jandandyrýǵa kiristi. Kómek retinde 170 mln teńge kóleminde nesıe alǵan. Al Qazaq jemis jáne júzim sharýashylyǵy ǵylymı-zertteý ınstıtýty bul iske ǵylymı turǵyda qoldaý kórsetken.
Bıyldan bastap Jambyl aýdanynda sharap óndirisi qaıta jandandy. Mundaǵy «Ońtústik sharap zaýyty» JShS Jasórken zaýytynyń negizinde jańa sharap zaýytyn iske qosty.
Óndiristiń bas tehnology Kenjeǵalı Qurmanqulovtyń aıtýynsha, zaýyt Ózbekstannan eksporttalǵan arnaıy materıaldardan óndeletin júzim sharabyn daıyndaıdy. Sondaı-aq, jambyldyq jańa zaýyttyń ónimderin tek jergilikti turǵyndar ǵana emes, soltústik óńirlerdiń de azamattary tutyna alady.
