Jambyl oblysynda sekseýil aǵashtary kóbirek ósirilmek
TARAZ. QazAqparat - Oblystyq ákimdikte sekseýil aǵashyn zańsyz otaýshylarmen kúres týraly aıtyldy, dep habarlaıdy, QazAqparat tilshisi oblys ákiminiń baspasóz qyzmetine silteme jasap.
Aımaq basshysy Asqar Myrzahmetov sekseýil aǵashy aýmaǵyn ulǵaıtý, zańsyz aǵash kesýge qarsy kúresti kúsheıtý jáne josparly negizde jasyl ekpelerdi jańǵyrtý boıynsha jumystar júrgizý qajettigin atap ótti.
«Sekseýildiń jerdi shóleıttenýden saqtaıtyn qasıeti bar. Elimizde sekseýil kesýge qatań tyıym salynǵanyna qaramastan, bul másele kún tártibinen túspeı tur. Oblys boıynsha 90 ákimshilik hattama toltyrylyp, 10 qylmystyq is qozǵaldy. Brakonerlermen kúres jalǵasýda»,-deıdi jergilikti tabıǵı resýrstar jáne tabıǵatty paıdalanýdy retteý basqarmasy basshysynyń orynbasary Maqsat Zaýrbekov.
Oblys ákimi sekseýildi saqtaýdyń bir joly óńirde orman tálimbaǵyn damytýdy qolǵa alý kerektigin aıtty.
«Jerimiz qolaıly, sý jetkilikti. Nelikten sekseýilge ósirýge arnalǵan tálimbaq jasamasqa? Kóshetterdi ákelý úshin kóp aqsha qajet. Ony ózimiz de ósire alamyz»,-dedi ákim.
Jyl saıyn Jambyl oblysynda 5 myń gektar jerge kóshet otyrǵyzylyp, orman aǵashtarynyń tuqymy sebiledi. Bıylǵy kúzde 5,3 myń gektarǵa jerge orman tuqymy sebilip, júz gektar jerge ýaqytsha tálimbaq jasaý josparlanyp otyr, buǵan 106,3 mln teńge qarjy qajet.
