Jambyl oblysynda saılaý protsesin 6500-den astam baıqaýshy baqylaýda
Daýys berý protsesin saıası partııalar men qoǵamdyq birlestikterdiń 6500-den astam baıqaýshysy baqylaýda,- dep habarlaıdy QazAqparat tilshisi.
Jambyl oblysynyń turǵyndary saılaýǵa belsendi qatysýda. Oblys boıynsha daýys berýge arnalǵan barlyǵy 492 saılaý ýchaskesi qurylǵan. Olar qajetti uıymdastyrý tehnıkalarymen jabdyqtalǵan, telefon baılanysy men ınternetke qosylǵan.
Ýchaskelik jáne aýmaqtyq komıssııalardyń jumysyna 3,8 myńnan astam adam qatysýda. Daýys berý protsesin saıası partııalar men qoǵamdyq birlestikterdiń 6,500-den astam baıqaýshysy baqylaýda.
Saılaý ýchaskeleri tańǵy saǵat 7-de jumysyn bastady. Baıqaýshylar alǵashqy saǵattardan-aq azamattardyń joǵary belsendiligin atap ótti. Jambyldyqtar turǵyndardy saılaýǵa belsendi qatysýǵa shaqyrýda.
Alǵashqylardyń biri bolyp Qordaı aýdany Masanchı aýyldyq okrýginiń ardagerler keńesiniń tóraǵasy Dydyr Dvýmarov óz tańdaýyn jasady.
«Búgin erekshe kún. Men memlekettiń saıası baǵyty ár saılaýshynyń daýysyna baılanysty dep sanaımyn», - deıdi D.Dvýmarov.
Baızaq aýdany Býryl aýylynyń turǵyny Úmit Bashatov ta onymen kelisedi.
«Bul kez-kelgen azamat úshin bolashaqtyń negizin qalaýǵa úles qosatyn asa mańyzdy oqıǵa. Men Qazaqstannyń odan ári damýǵa jeteleıtin reformalar jolymen júretinine senimdimin», - dep atap ótti aýyl turǵyny.
Qasqabulaq aýylynyń turǵyndary da tys qalmaı, ózderiniń konstıtýtsııalyq quqy,yn paıdalanyp, daýys berýge belsene qatysýda.
«Elimizdiń kez-kelgen azamaty daýys berýge quqyly. Daýys berý arqyly biz órkendeý, ultaralyq kelisim jáne turaqtylyqty nyǵaıtý jolyn tańdaımyz», - deıdi Talas aýdany, Qasqabulaq aýylynyń turǵyny Sýlhadın Mustafaev.
Aıta keteıik, Jambyl oblystyq saılaý komıssııasynda 5 partııanyń fılıaldarynan 206 mandatqa 523 kandıdat tirkelgen («Nur Otan» – 390 kandıdat, «Aýyl» – 44 kandıdat, «Aq jol» – 44 kandıdat, «Adal» – 31 kandıdat, «Qazaqstannyń Halyq partııasy» – 14 kandıdat).
Oblystyq saılaý komıssııasynyń habarlaýynsha, eldegi epıdemıologııalyq jaǵdaıǵa baılanysty barlyq saılaý ýchaskelerinde sanıtarlyq talaptar qatań saqtalýda.
