Jambyl oblysynda polıtsııa baqylaý kamerasynyń kómegimen 182 qylmysty ashty

TARAZ. QazAqparat – Jedel basqarý ortalyǵynda Jambyl oblysy polıtsııa departamentiniń bastyǵy Janat Súleımenovtiń tóraǵalyǵymen qaýipsizdik sharalaryn arttyrý máseleleri boıynsha keńes ótkizildi, dep habarlaıdy QazAqparat tilshisi.

Janat Súleımenov bes aıdyń ishinde Jedel basqarý ortalyǵyndaǵy 102 operatorynyń habarlamasy boıynsha 182 qylmys izin sýymaı ashylǵanyn málim etti. Ortalyq operatorlarynyń qyraǵylyǵy nátıjesinde 52 qylmys ashylyp, 10 898 ákimshilik quqyq buzýshylyq anyqtalǵan.

«Іshki ister mınıstriniń polıtsııa qyzmetkerleriniń aldyna qoıǵan segiz mindetiniń biri – jedel basqarý ortalyqtarymen birlese otyryp, qoǵamdyq oryndarda, eldi mekenderde jáne joldarda qaýipsizdik júıelerin damytýǵa baǵyttalǵan. Syrttaı baqylaý kameralary quqyq buzýshylyqtardy tirkeýge, qoǵamdyq oryndardaǵy jedel jaǵdaıdy baqylaýdy júzege asyrýǵa múmkindik beredi. Qylmystar men oqıǵalar týraly habarlamalardy qabyldaý boıynsha jumys avtomattandyrylǵan», - dedi oblysy polıtsııa departamentiniń bastyǵy.

Janat Súleımenovtiń aıtýynsha, ótken jyly Taraz qalasynyń jańa massıvter men shaǵyn aýdandaryn engizý bóliginde Jedel basqarý ortalyǵynyń elektrondy kartasyn jańartý júzege asyrylǵan. Bıyl JBO elektrondy kartasyn jańǵyrtý josparlanyp otyr. Karta Іshki ister mınıstrliginiń derekter bazasymen sınhrondalady.