Jambyl oblysynda polıtseıler jolda qalǵan balaly áıeldi qutqardy
TARAZ. QazAqparat – Qar qursaýynan qutqarylǵan aımaq turǵyndary polıtseılerge alǵys aıtty, dep habarlaıdy QazAqparat tilshisi Jambyl oblysy polıtsııa departamentiniń baspasóz qyzmetine silteme jasap.
Eske sala keteıik, Jambyl oblysynda qolaısyz aýa raıyna baılanysty tek Almaty-Shymkent respýblıkalyq tasjoly ǵana emes, sonymen qatar jergilikti avtojoldar da jabylǵan bolatyn.
Jambyl oblysy polıtsııa departamentiniń baspasóz qyzmeti habarlaǵandaı, Jýaly aýdandyq polıtsııa bólimi men Jambyl oblysy PD patrýldik polıtsııa batalonynyń qyzmetkerleri qaýipti kezeńde jol ústindegi keleńsiz jaǵdaılardyń aldyn alý úshin kóp kúsh jumsady. Eki táýlik boıy burqasynǵa qaramastan olar jumys istedi.
«Aýa raıynyń qolaısyzdyǵy men joldyń kórinbeýinen Jýaly aýdanynyń bes ýchaskesindegi joldardy jabýǵa týra kelgen. 30 polıtsııa qyzmetkeri, 15 qar tazartý tehnıkasy men jol qyzmetkerleri jumyldyryldy», - dep habarlady Jambyl oblysy polıtsııa departamenti jergilikti polıtsııa qyzmeti basqarmasy basshysynyń orynbasary, polıtsııa polkovnıgi Samat Qusaıynov.
Onyń aıtýynsha, polıtsııanyń basty mindeti – qar basqan joldarda júrgizýshiler men jolaýshylardyń qaýipsizdigin qamtamasyz etý, olarǵa jan-jaqty kómek kórsetý. Qutqarylǵan azamattar óz kezeginde qıyn ýaqytta qoldaý kórsetken polıtsııa qyzmetkerlerine alǵys aıtty.
«Máselen, Tarazdan Shymkentke bara jatqan kólikterdiń birinde balasy bar áıel bolǵan, - dedi vedomstvonyń baspasóz qyzmetinen. – Qarly boranda qalyp qoıǵan áıeldiń aıtýynsha, olar túrli qyzmetterge qońyraý shala bastaǵan. Birinshi bolyp polıtsııa qyzmetkerleri kómekke kelgen. Tártip saqshylary olardy qar qursaýynan qutqaryp, jylytyp, tamaqtandyrǵan, kólikti qardan shyǵaryp alǵan. Sodan keıin Tarazǵa deıin shyǵaryp salǵan».
«Sizderdiń kómekterińizdiń arqasynda biz aman qaldyq», - dep alǵysyn bildirdi jolda qalyp qoıǵan áıel polıtseılerge.
Qazirgi ýaqytta Jambyl oblysynda kez kelgen kólik túrleri úshin barlyq jol ashyldy. Polıtsııa departamenti qolaısyz aýa raıy jaǵdaıynda oblys turǵyndary men qonaqtaryna alys sapardan bas tartýǵa, al tótenshe jaǵdaıda dereý polıtsııaǵa kómekke júginýge shaqyrady.
Bul kúnderi «jedel jeli» telefonyna 80-nen astam qońyraý kelip túsken. Onyń ishinde psıhologııalyq kómek kórsetý boıynsha túsken qońyraýlar bar. Qutqarý jumystaryna medıtsınalyq qyzmet, Jambyl oblysy TJD, «Qazavtojol» JShS qyzmetkerleri men tehnıka tartyldy.
«Aısha bıbi» beketinde medıtsınalyq jedel járdem brıgadasy men «Apattar medıtsınasy ortalyǵy» brıgadasy kezekshilik etedi.
