Jambyl oblysynda pırotehnıka satylatyn oryndarǵa reıd júrgiziledi
TARAZ. QazAqparat - Tarazda jáne Jambyl oblysynda pırotehnıkalyq ónimderdi saýdalaý bastaldy. Osyǵan qaraı óńirdiń tótenshe jaǵdaılar qyzmetiniń ókilderi belsendi túsindirý jumystaryn júrgizýde, dep habarlaıdy QazAqparat.
Jańajyldyq merekelerdi qalaı qaýipsiz ótkizýge bolatyndyǵy jóninde Jambyl oblystyq Tótenshe jaǵdaılar departamentiniń órt qaýipsizdigi salasyndaǵy baqylaý jáne saýyqtyrý qyzmeti basqarmasynyń bastyǵy Maqsat Ákimbaev áńgimelep berdi.
«Órt qaýipsizdigin saqtap, pırotehnıkany arnaıy sertıfıkaty bar adamdardan alý kerek. Saýdaǵa da tek sertıfıkaty bar pırotehnıkalardy shyǵarýǵa ruqsat etilgen. Sondaı-aq olardy paıdalanýdyń qazaq jáne orys tilderindegi nusqaýlyqtary bolýy kerek. Pırotehnıkany ózge taýarlarmen birge saqtaýǵa bolmaıdy. Al 14 jasqa deıingi jáne mektep oqýshylaryna jaryqtandyrǵysh jáne qatty dybys shyǵaratyn pırotehnıkalyq buıymdardy paıdalanýǵa múldem tyıym salynady»,-deıdi basqarma bastyǵy.
Onyń sózinshe, pırotehnıkalyq buıymdardyń baqylaýsyz paıdalanylýy órt oqıǵalaryna, túrli dene jaraqattary men keıde tipti kisi ólimine de sebepker bolyp jatady. Bul ásirese jasóspirimderge qatysty aıtylatyn sóz. Jyl saıyn qys mezgili kelisimen pırotehnıkalyq búıymdardy satý jumystary bastalady jáne bul ónimderdiń kópshiligi arnaıy serttıfıkaty joq naǵyz kontrafakti bolyp tabylady.
«Departament ókilderi turǵyndarmen 260 kezdesý ótkizip, arnaıy estelik qaǵazdar men broshıýralar taratty. Biz sonymen qatar pırotehnıkalyq ónimder satylatyn saýda oryndary men bazarlarǵa reıd júrgizemiz. Ruqsaty joq ónim tabylsa, ony qoldanystan alamyz. Jańajyldyq merekeler eshqandaı qıyndyqtarsyz shyn máninde qyzyqty ótýi úshin Jambyl oblystyq Tótenshe jaǵdaılar departamentiniń ókilderi jańajyldyq merekelerdi uıymdastyrýda qoıylatyn talaptardy belsendi túsindirýde»,-dedi Maqsat Ákimbaev.
