Jambyl oblysynda paraqor ákim úsh jylǵa sottaldy
TARAZ. QazAqparat - Sybaılas jemqorlyqqa qarsy is-qımyl ulttyq bıýrosynyń Jambyl oblystyq departamenti 2017 jyldy qorytyndylady, dep habarlaıdy «QazAqparat» HAA tilshisi.
Vedomstvonyń málimetterine qaraǵanda, óńirde jyl basynan beri sybaılas jemqorlyqqa baılanysty 155 qylmys tirkelip, berilgen paranyń jalpy somasy 1,5 mln teńgege jetken. Onyń úshten ekisi aýyr qylmystar bolǵan.
Atap aıtqanda, Merki aýyldyq okrýginiń ákimi E. Qosýaqov sol aýyldyń turǵynynan 150 myń teńge para talap etip, qylmys ústinde ustalǵan. Oǵan qylmystyq jolmen tabylǵan múlkin tárkilep, ómir boıy memlekettik qyzmette laýazym ıelenýine tyıym salý jáne úsh jylǵa bas bostandyǵynan aıyrý jazasy berildi.
Qarataýda «Óńirlerdi damytý-2020» memlekettik baǵdarlamasy boıynsha salynǵan úıdiń komıssııa aktisine qol qoıý úshin 1 mln teńge talap etken sáýlet jáne qala qurylysy bóliminiń basshysy ustaldy, qylmystyq is sot qaraýynda tur.
Departamenttegiler «1424» nómirine qońyraý shalyp, sybaılas jemqorlyq faktisi týraly habar bergen azamattarǵa aqshalaı syıaqy beriletinin, al qupııalylyq tolyq saqtalatynyn aıtady.
«2017 jylǵy 10 aıda Jambyl oblysynda 20 azamat yntalandyryldy. Syıaqy kólemi 50-den 70 AEK-ke deıin jetedi. Yntalandyrý qarajattarynyń jalpy somasy 2 mıllıon teńgeden asty», - deıdi Jambyl oblystyq departamentiniń baspasóz hatshysy Dıdara Mádimarova.
