Jambyl oblysynda ózin-ózi jumyspen qamtyǵandar týraly málimet qaıta jasaqtalady
ASTANA. QazAqparat - Jambyl oblysynda ózin-ózi jumyspen qamtyǵandar týraly bazalyq málimet úı-úıdi aralaý arqyly qaıta jasaqtalady. Bul týraly búgin Ortalyq kommýnıkatsııalar qyzmetindegi brıfıngte Jambyl oblysynyń ákimi Kárim Kókirekbaev málim etti, dep habarlaıdy QazAqparat.
«Áleýmettik salada Nátıjeli jumyspen qamtýdy jáne jappaı kásipkerlikti damytýdyń 2017 - 2021 jyldarǵa arnalǵan baǵdarlamasy erekshe nazarda tur. Baǵdarlamany júzege asyrýǵa ústimizdegi jyly 9 mlrd 871 mln teńge bólindi. Bul 14 myńnan asa adamdy jumyspen qamtýǵa múmkindik berdi. Aǵymdaǵy jyldyń segiz aıynda 17126 adam jumyspen qamtyldy. Baǵdarlama óz nátıjesin berýde. Jumyssyzdyq 4,9 paıyz deńgeıinde turaqtandy», - dedi oblys basshysy.
Degenmen, Kárim Kókirekbaev Elbasy Nursultan Nazarbaev taıaýdaǵy saparynda oblysta nátıjeli jumyspen qamtý máselesiniń sheshilmeı otyrǵanyna nazar aýdarǵanyn eske saldy.
«Búginde ekonomıkalyq belsendi turǵyndardyń 42 paıyzy ózin-ózi jumyspen qamtyǵandar. Bul rette, óz betinshe nátıjesiz jumyspen qamtylǵandardyń esebin naqtylaý boıynsha is-sharalar jospary ázirlendi. Úı-úıdi aralaý arqyly osy sanattaǵy adamdardy qaıta naqtylap, bazalyq málimetter ózektendiriletin bolady. Salyq organdarynda tirkelýge jatatyn azamattar jeke, shaǵyn kásipkerlik sýbektileri sanatyna aýystyrylady», - dedi ol.
