Jambyl oblysynda ormanshylarǵa 6 qyzmettik kólik tapsyryldy

TARAZ. QazAqparat - Jambyl oblysynyń ormanshylaryna jol talǵamaıtyn 6 ÝAZ-236324 avtokóligi tabys etildi, dep habarlaıdy QazAqparat tilshisi.

Tabıǵı resýrstar jáne tabıǵat paıdalanýdy retteý basqarmasynda ótken is-sharaǵa oblys ákiminiń orynbasary Qanatbek Mádibek qatysyp, bul salaǵa bıyl 280 mıllıon teńge qarajat bólingenin aıtty.

«Memleket basshysy qorshaǵan ortany qorǵaýda ásirese, orman órtiniń aldyn alý máselesine erekshe kóńil bólip otyr. Óńirimizde orman órtin boldyrmaý maqsatynda keshendi jumystar atqarylyp jatyr. Bıyl orman sharýashylyǵy, «Sapsan jedel qyzmeti» jáne «Jambyl sý qoımasy» mekemeleriniń materıaldyq-tehnıkalyq bazasyn nyǵaıtýǵa 280 mıllıon teńge qarjy qaralyp, qajetti tehnıkalar alynýda. Máselen, biz ótken aptada ǵana jańa tehnıkalardyń bir bóligin tapsyrdyq. Onyń ishinde MTZ markaly 9 traktor men aýyl jáne orman sharýashylyǵy tehnıkalary bar.

Jalpy, oblysta osy salanyń materıaldyq-tehnıkalyq bazasyn jaqsartý úshin 2018-2022 jyldary 1 mıllıard 300 mıllıon teńge qarjy bólindi. Nátıjesinde tehnıkalardyń jańarý deńgeıi 78 paıyzǵa jetti. Ormanshylarǵa aldaǵy ýaqytta «Sapsan jedel qyzmetiniń» arnaıy avtokóligi men jyljymaly vagon da beriletin bolady», – dedi Qanatbek Mádibek.

Aıta keteıik, oblys aýmaǵynyń 31 paıyzǵa jýyǵyn, ıaǵnı, 4,4 mıllıon gektaryn memlekettik orman qory qurasa, ondaǵy 15 orman sharýashylyǵy mekemesinde 932 qyzmetker bar.

Buǵan deıin Jambyl aýrýhanalaryna 20 reanımobıl men 20 sanıtarlyq avtokólik alynatynyn habarlaǵanbyz.