Jambyl oblysynda orman órtterin anyqtaý úshin 32 órt-baqylaý munarasy ornatyldy

TARAZ. QazAqparat – Jambyl oblysy boıynsha orman órtterin der kezinde anyqtaý úshin 32 órt-baqylaý munarasy men memlekettik mekemeler aýmaǵyna kirý oryndarynda 20 baqylaý pýnkti ornatyldy, dep habarlaıdy QazAqparat tilshisi.

Oblystyq TJD zilzalalar qaýip-qaterlerin tómendetý jáne azamattyq qorǵaý salasyndaǵy baqylaý basqarmanyń bastyǵy Jasuzaq Ibraımovtyń aıtýynsha, tabıǵı órtterdiń aldyn alý maqsatynda TJ bólimderi, jergilikti polıtsııa qyzmeti jáne jergilikti atqarýshy organdar jeke quramynyń kúshimen jalpy sany 84 adamnan turatyn 18 birlesken mobıldi top qurylyp, tártip buzýshylardy anyqtaý jáne úgit-nasıhat jumystaryn júrgizý maqsatynda 220 reıd júrgizilgen.

​«Reıd barysynda 35 quqyq buzýshy QR «Ákimshilik quqyq buzýshylyq týraly» Kodeksiniń 336 baby boıynsha eskertý túrinde ákimshilik jaýapkershilikke tartylǵan. Onda ónerkásiptik jáne turmystyq qaldyqtardy jınaý jáne olardy jaǵý kezinde órt qaýipsizdigi erejelerin buzǵany úshin azamattardy ákimshilik jaýapkershilikke tartý qarastyrylǵan. Jergilikti bıýdjetten memlekettik orman qorynyń aýmaǵyn órtten qorǵaý boıynsha jumystar júrgizý úshin 2020 jylǵa 78 mln teńge, sondaı-aq memlekettik orman qorynyń materıaldyq-tehnıkalyq bazasyn jaqsartý úshin 4,8 mln teńge bólindi»,- deıdi J. Ibraımov.

Sondaı-aq, atalǵan basqarma basshysy jeke quramdy qıyn taýly jerlerge jetkizý úshin 10 ótimdiligi joǵary tehnıka, tabıǵı órtterdi sóndirý úshin 68 ótimdiligi joǵary avtotsısternalar, 139 rantsti órt sóndirgishter, 1000 hlopýshkalar, sondaı-aq 7 «Týraıa», «Irıdıým» spýtnıktik termınaldary daıarlanǵandyǵyn jetkizdi.

Jol qyzmetteriniń jumys josparyna sáıkes oblys aýmaǵyndaǵy respýblıkalyq mańyzy bar 1237 km avtojoldardan 638 km, 1943 km oblystyq mańyzy bar avtojoldardan 712 km, al 840 km temirjoldardan 104 km qashyqtyqta orman ekpeleri boıynsha órtke qarsy jolaqtar jyrtylǵan.