Jambyl oblysynda ónerkásip kásiporyndary qyzmetkerleriniń jalaqysy ósýde
Memleket basshysynyń tapsyrmasyna sáıkes «Qazfosfat» JShS qyzmetkerleriniń (barlyǵy 6200 adam eńbek etedi) jalaqysy ótken jyly 40 paıyzǵa, bıyl 15 paıyzǵa, «Taraz metallýrgııa zaýyty» JShS qyzmetkerleriniń jalaqysy 25 paıyzǵa (770) artty.
«Qazfosfat» JShS fosforıtter, sary fosfor, ammofos jáne trıkaltsııfosfatyn óndiredi. Shyǵarylǵan ónimniń 80 paıyzǵa jýyǵy Reseı, Belarýs, Ýkraına, Lıtva, Latvııa, Polsha jáne basqa elderge eksporttalady.
Bas dırektor Nurhan Nurlanov áleýmettik mindettemelerdi oryndaýǵa erekshe kóńil bólinetinin atap ótti. Kásiporyn nebári úsh aıda Qarataý qalasynda 72 páterli úıdi jóndeýden ótkizip paıdalanýǵa berdi. Onda birinshi kezekte, kóp balaly otbasylar, óndiris ardagerleri, sondaı-aq eńbek múgedekteri baspanaly boldy. Sonymen qatar, osy qalada «Qazfosfat» JShS qarajatyna «Táýelsizdikke 30 jyl» saıabaǵy salyndy. Jańatas qalasynda jumysshylar úshin 220 páterlik turǵyn úı keshenin salý josparlanýda.
«Tarazǵa tartý» jobasy aıasynda kompanııa Úshbulaq jaǵalaýyn qaıta jańǵyrtý jumystaryn júrgizdi.
Jalpy, seriktestik ótken jyly áleýmettik nysandardyń qurylysyna 6,8 mıllıon AQSh dollaryn bólse, bıyl 21,2 mln AQSh dollaryn qarastyrǵan.
Qazirgi ýaqytta quny 77,6 mln AQSh dollaryn quraıtyn, jylyna 500 myń tonna ammofos shyǵarýǵaqaýqarly jańa jeliniń qurylysy júrýde. Oǵan barlyǵy 20 merdigerlik uıym, 600-den astam qurylysshy tartylǵan. Jeli iske qosylǵannan keıin 500-den astam turaqty jumys orny ashylmaq.
Al «TMZ» JShS jyl saıyn 60 myń tonnaǵa deıin ferroqorytpa men 48 myń tonna elektrod massasyn óndire alady. Bul týraly bas dırektory Ǵabıt Sultanqulov jetkizdi. Ónim Ózbekstan, Tájikstan, Reseı, Grýzııa, Qyrǵyz Respýblıkasyna eksporttalady. Kásiporyn Qazaqstandaǵy elektrodmassasyn jalǵyz óndirýshi bolyp tabylady. Elektrod massasyn shyǵarý tsehyn jańǵyrtý jáne qoımany qaıta jańǵyrtý jumystary atqarylýda.
Keńeste bastaýysh kásipodaq uıymdarynyń tóraǵalary da esep berdi.
«Qandaı da bir qıyndyqtarǵa qaramastan, zaýyttardyń úzdiksiz jumysyn qamtamasyz etý, ujymdyq sharttar boıynsha mindettemelerdi oryndaý qajet. Memleket basshysynyń tapsyrmalaryna sáıkes otandyq taýar óndirýshilerdi qoldaý boıynsha úlken jumystar oryndalýda. Oblystyń iri ónerkásip kásiporyndaryna jan-jaqty qoldaý kórsetiledi. Jumys oryndaryn qysqartpaý, jalaqyny arttyrý, eńbek jaǵdaılaryn jaqsartý sekildi máseleler árqashan erekshe baqylaýda bolýy tıis. Kásiporyndar oblystaǵy kolledjdermen jáne joǵary oqý oryndarymen yntymaqtastyqty kúsheıtýi qajet. Dýaldy oqytýdy engizý jumystaryndaǵy formalızmnen arylý jáne suranysqa ıe mamandardy birlesip daıarlaý kerek», - dep atap ótti oblys ákimi.
Aımaq basshysy bıznestiń áleýmettik jaýapkershiligi basty nazarda bolýy mańyzdy ekenin aıtty.
«Bizdiń mindetimiz – áleýmettik máselelerdi birlesip sheshý jáne turǵyndar úshin qolaıly jaǵdaı jasaý», - dedi Berdibek Saparbaev.
Kezdesý barysynda kadrlardyń jetispeýshiligi, logıstıka, qoǵamdyq kólik jumysy, joldardyń jaǵdaıy, sanıtarlyq-qorǵaý aımaǵyn abattandyrýǵa qatysty máselelerge de kóńil bólindi.
