Jambyl oblysynda on alty jasar jasóspirim ot qushaǵynan úsh balany alyp shyqty
ASTANA. Qazannyń 8-i. QazAqparat - Jambyl oblysynda on alty jasar jasóspirim órtten úsh balany qutqardy. Bul týraly Qazaqstannyń Tótenshe jaǵdaılar mınıstrliginen habarlady.
Oqıǵa qazannyń 5-i kúni Jambyl aýdanynyń Túrksib aýylynda oryn aldy. Órt mal ustaıtyn bazanyń turǵyn jaı retinde qoldanylǵan ǵımaratynda jáne shóp saraıynda boldy.
Taraz qalasynyń órt sóndirýshileri tilsiz jaýmen bes saǵatqa jýyq kúresti. Jalynnyń sharpyǵan jalpy aýmaǵy 900 sharshy metrdi qurady. Sondaı-aq órt saldarynan 5000 teń (82 tonna) shóp kúlge aınaldy.
TJM-nan málim etkendeı, mal bazasynda úsh otbasy turǵan. Bul kúni bir januıanyń bir, úsh jáne alty jastaǵy 3 balasy úıde jalǵyz qalǵan. Esigi syrtynan qulyptalǵan úıden shyqqan órtti birinshi bolyp kórshisi, temirjol kolledjiniń stýdenti Nursultan Júnisov kórgen. Ol otqa oranǵan úıdiń ishinen aldymen eki balany, keıin qaıta oralyp, túpki bólmede bolǵan úshinshi balany alyp shyqqan.
Aldyn ala boljam boıynsha, tótenshe jaǵdaı balalardyń otpen oınaýy saldarynan bolǵan.
