Jambyl oblysynda oqýshylarǵa 2 mlrd teńgege jýyq qarjy úlestiriledi

TARAZ. QazAqparat – Bıyl Jambyl oblysynda «Mektepke jol» aktsııasy aıasynda jalpyǵa birdeı mindetti bilim berý qorynan 48 671 balaǵa 40 567 teńgeden 1 mıllıard 974 mıllıon 436 myń teńge qarjy qarastyryldy, dep habarlaıdy QazAqparat tilshisi.

Oblystyq bilim basqarmasy basshysynyń orynbasary Aıdyn Dosybaeva óńirlik kommýnıkatsııalar qyzmeti alańynda ótken brıfıngte málim etkendeı, qarajat Taraz qalasyndaǵy ata-analardyń jeke shottaryna jiberilip jatyr. Al, aýdandarda 10 tamyzǵa deıin aýdarylady.

Ótken jyly osy aktsııanyń aıasynda demeýshiler esebinen 7 656 balaǵa 108 mıllıon 308 myń teńge kóleminde qoldaý kórsetilip, qajetti qural-jabdyqtar men kıimder úlestirilgen bolatyn.

Aıta keteıik, turmysy tómen jáne kóp balaly otbasylardan shyqqan, jetim balalar men ata-anasynyń qamqorlyǵynsyz qalǵan oqýshylarǵa jańa oqý jylyna daıyndyq kezeńinde jáne áleýmettik sebepter boıynsha balalardyń mektepke barmaýynyń aldyn alý úshin jyl saıyn jalpy respýblıkalyq «Mektepke jol» aktsııasy uıymdastyrylady.

Bıyl dástúrli qaıyrymdylyq aktsııasy 1 tamyz ben 30 qyrkúıek aralyǵynda «Jaqsylyq jasa!» uranymen ótkiziledi.

Buǵan deıin Jambyl oblysynda 15 myńnan astam oqýshy 1-synypqa qabyldanǵanyn jazǵan bolatynbyz.