Jambyl oblysynda ókpesi 60 paıyz zaqymdanǵan 83 jastaǵy áıel koronavırýstan jazylyp shyqty
TARAZ. QazAqparat – Jambyl oblysynyń 83 jastaǵy turǵyny óziniń erik-jigeri, saýyǵyp shyǵýǵa degen seniminiń arqasynda koronavırýsty jeńip shyqty, dep habarlaıdy QazAqparat.
Jambyl oblystyq Densaýlyq saqtaý basqarmasynan málim etkendeı, Jýaly aýdanynyń 83 jastaǵy turǵyny Núrıpa Dáýletbaı júregi aýyrǵan. Olarǵa taǵy bir aýrý qosylǵanda, ájeı ony elemeı, úıinde emdelip júrgen. Alaıda densaýlyǵy nasharlap, qurǵaq jótel, jalpy álsizdik, demigý paıda bolyp, tynys alýy qıyndaǵanda, jedel járdem ony Jýaly aýdanynyń aýrýhanasyna jetkizdi.
«Keýdesine rentgenologııalyq zertteý jasalǵan soń, egde jastaǵy áıelge pnevmonııa dıagnozy qoıylyp, ol Taraz qalasynyń ınfektsııalyq bólimine aýystyryldy. PTR taldaý qorytyndysy oń bolyp shyqty, dárigerler áıelge «Covid-19, vırýstyq pnevmonııa - 60%» dıagnozyn qosty. Naýqas taldaý qorytyndysynan shoshynyp ketti, alaıda dárigerler ony emdeý úshin qoldan kelgenniń bárin jasaıtynyna jáne olardy tyńdap, keńesterin oryndaǵan jaǵdaıda, tolyq jazylyp shyǵatynyna sendirdi», - dep baıandady oblystyq densaýlyq saqtaý basqarmasynan.
Jasynyń úlken bolǵanyna qaramastan, patsıent áıeldiń erik-jigeri myqty bolyp, jazylyp shyǵatynyna sendi. Ol dáriger keńesterin tolyq oryndap, qan qysymynyń joǵary bolýy, uıqysyzdyq pen búıreginiń zaqymdanýyna qaramastan, 16 kúnnen soń tolyq jazylyp, úıine qaıtyp oraldy.
«Medıtsınalyq qyzmetkerlermen qoshtasqan kezde, batyl ájeı barlyǵyna qaı jaǵdaı bolmasyn, jaqsylyqqa senip, kúresýden sharshamaýdy keńes etti» dep baıandady vedomstvonyń baspasóz qyzmetinen.
